காலிஸ்தான் ஆதரவு அணிவகுப்பு தொடர்பாக கனடாவை தொடர்புகொண்ட இந்தியா
கனடா டொராண்டோவிலுள்ள மால்டனில் நடந்த நகர் கீர்த்தன் அணிவகுப்பில் காலிஸ்தான் சார்பு படங்கள் காட்சிப்படுத்தப்பட்டதையடுத்து, தீவிரவாதிகளுக்கு இடம் கொடுத்ததற்காக கனடாவை இந்தியா மீண்டும் சாடியுள்ளது. இதுகுறித்து வெளியுறவு அமைச்சக செய்தித்தொடர்பாளர் ரந்தீர் ஜெய்ஸ்வால் வெளியிட்டுள்ள அறிக்கையில்,"எங்கள் அரசியல் தலைமைக்கு எதிராக கனடாவில் உள்ள தீவிரவாதிகள் வன்முறைப் படங்களைப் பயன்படுத்துவதைப் பற்றி நாங்கள் பலமுறை கடுமையான கவலைகளை எழுப்பியுள்ளோம். நமது முன்னாள் பிரதமரின் பேரணியில் இந்திய தூதரக அதிகாரிகளின் சுவரொட்டிகள் காட்சிப்படுத்தப்பட்டு, அவர்களுக்கு எதிராக வன்முறை அச்சுறுத்தல் விடுக்கப்பட்டுள்ளது". "வன்முறையைக் கொண்டாடுவதும் மகிமைப்படுத்துவதும் எந்தவொரு நாகரீக சமூகத்தின் ஒரு பகுதியாக இருக்கக்கூடாது. சட்டத்தின் ஆட்சியை மதிக்கும் ஜனநாயக நாடுகள் கருத்துச் சுதந்திரம் என்ற பெயரில் தீவிரவாதிகளின் அச்சுறுத்தலை அனுமதிக்கக்கூடாது," என்று அவர் மேலும் கூறினார்.
கனடாவில் நடந்த காலிஸ்தான் பேரணி
நாகர் கீர்த்தனை அணிவகுப்பு ஒண்டாரியோ குருத்வாரா கமிட்டியால் ஏற்பாடு செய்யப்பட்டது. அங்கு வைக்கப்பட்ட மிதவைகள் மற்றும் பேச்சுக்கள், இந்திய அரசியல் பிரமுகர்களை ஆக்ரோஷமாக குறிவைத்தும், சிறை கம்பிகளுக்குப் பின்னால் பிரதமர் நரேந்திர மோடி இருப்பது போலவும் சித்தரிக்கப்பட்டிருந்தது. "கனடாவில் உள்ள எங்கள் இராஜதந்திர பிரதிநிதிகளின் பாதுகாப்பு குறித்து நாங்கள் தொடர்ந்து அக்கறை கொண்டுள்ளோம். மேலும் அவர்கள் தங்கள் பொறுப்புகளை அச்சமின்றி நிறைவேற்றுவதை கனடா அரசாங்கம் உறுதி செய்யும் என்று எதிர்பார்க்கிறோம்" என்று ஜெய்ஸ்வால் கூறினார். "குற்றவியல் மற்றும் பிரிவினைவாத கூறுகளுக்கு கனடாவில் பாதுகாப்பான புகலிடத்தையும் அரசியல் இடத்தையும் வழங்குவதை நிறுத்துமாறு கனடா அரசாங்கத்தை நாங்கள் மீண்டும் கேட்டுக்கொள்கிறோம்," என்று அவர் மேலும் கூறினார்.
