'எதிர்க்கட்சிகள் இந்து மதத்தை வெறுக்கின்றன': உதயநிதியின் கருத்துக்கு அமித்ஷா பதில்
திமுக செயல்தலைவர் மு.க.ஸ்டாலினின் மகனும் தமிழக அமைச்சருமான உதயநிதி ஸ்டாலின் சனாதன தர்மம் குறித்து பேசியது, எதிர்க்கட்சிகள் இந்து மதத்தை வெறுக்கின்றன என்பதையும், அது நமது பாரம்பரியத்தின் மீதான தாக்குதல் என்பதையும் காட்டுகிறது என மத்திய உள்துறை அமைச்சர் அமித்ஷா தெரிவித்துள்ளார். ராஜஸ்தானின் துங்கர்பூரில் நடந்த பாஜகவின் பரிவர்த்தன் யாத்திரையின் தொடக்க விழாவில் பேசிய அமித்ஷா இதை தெரிவித்துள்ளார். வரவிருக்கும் ராஜஸ்தான் மாநில தேர்தலில் ஆளும் காங்கிரஸை தோற்கடித்து ஆட்சியைப் பிடிக்க பாஜக தீவிர முயற்சியில் ஈடுபட்டு வருகிறது. இந்நிலையில், சனாதன தர்மம் குறித்த உதயநிதி ஸ்டாலினின் கருத்துக்கள் INDIA கூட்டணி கட்சிகளின் "வாக்கு வங்கி அரசியல்" தந்திரத்தின் ஒரு பகுதி என்று உள்துறை அமைச்சர் குற்றம் சாட்டியுள்ளார்.
ராகுல் காந்தியின் கருத்துக்களுக்கு அமித்ஷா எதிர்ப்பு
திமுக தலைவர் உதயநிதி ஸ்டாலினின் கருத்துக்களை பயன்படுத்தி, திமுக கூட்டணியில் உள்ள காங்கிரஸ் கட்சியை கடுமையாக சாடிய அமித்ஷா, "வாக்கு வங்கி அரசியலுக்காக காங்கிரஸ் எந்த எல்லைக்கும் செல்லலாம்" என்று கூறியுள்ளார். மேலும், 2010ஆம் ஆண்டு காங்கிரஸ் தலைவர் ராகுல் காந்தி இந்து அமைப்புகள் குறித்து பேசியதையும் அமித்ஷா சுட்டி காட்டினார். 2010ஆம் ஆண்டு காங்கிரஸ் தலைவர் ராகுல் காந்தி, "பயங்கரவாத அமைப்புகளான லஷ்கர்-இ-தொய்பாவை விட தீவிர இந்து அமைப்புகள் நாட்டிற்கு மிகப்பெரிய அச்சுறுத்தலாக இருக்கின்றன" என்று கூறியிருந்தார். "ராகுல் பாபா, நீங்கள் இந்து அமைப்புகளை லஷ்கர்-இ-தொய்பாவுடன் ஒப்பிட்டீர்கள், உங்கள் உள்துறை அமைச்சர் நாட்டில் 'இந்து பயங்கரவாதம்' உள்ளது என்று கூறினார். எதிர்க்கட்சிகள் இந்து மதத்தை வெறுக்கின்றன" என்று அமித்ஷா விமர்சித்துள்ளார்.
இந்த காலவரிசையைப் பகிரவும்