'டிடிவி தினகரன் திவாலானார்' என்று பிறப்பிக்கப்பட்ட நோட்டீஸ் செல்லாது - சென்னை உயர்நீதிமன்றம்
வெளிநாடுகளிலிருந்து ரூ.62.61 லட்சம் ரூபாய் மதிக்கத்தக்க அமெரிக்கா டாலர்களை, கடந்த 1995-96ம்.,ஆண்டின் காலகட்டத்தில் அங்கீகரிக்கப்படாத முகவர் மூலம் பெற்றதற்காகவும், அந்த டாலர்களை இங்கிலாந்திலுள்ள நிறுவனங்களில் சட்ட-விரோதமான முறையில் மாற்றிய குற்றத்திற்காகவும் அமமுக முன்னாள் பொது செயலாளரான டிடிவி தினகரன் மீது அன்னிய செலவாணி ஒழுங்குமுறை என்னும் சட்டத்தின் கீழ் அமலாக்கத்துறை வழக்குப்பதிவு செய்தது. அதன்படி 2008ம் ஆண்டு தினகரனுக்கு அமலாக்க இயக்குநரகம் ரூ.31 கோடி அபராதம் விதித்து உத்தரவிட்டது. இதற்கு எதிர்ப்பு தெரிவித்து டிடிவி தினகரன், அமலாக்கத்துறை மேல்முறையீட்டு ஆணையத்தில் மேல்முறையீடு செய்த நிலையில், ரூ.31 கோடியினை ரூ.28 கோடியாக குறைத்து உத்தரவு பிறப்பித்தது. இந்த அபராத தொகையினை அவர் கட்டாத காரணத்தினால் டிடிவி தினகரன் திவாலாகிவிட்டார் என்று அமலாக்கத்துறை நோட்டீஸ் பிறப்பித்தது.
அமலாக்கத்துறை தாக்கல் செய்த மேல்முறையீடு வழக்கு தள்ளுபடி
இதனையடுத்து, இந்த நோட்டீஸை எதிர்த்து தினகரன் தரப்பினர் சென்னை உயர்நீதிமன்றத்தில் மேல்முறையீடு செய்தனர். இதன் விசாரணையின்போது, 'டி.டி.வி.தினகரனை அவமானப்படுத்தும் நோக்கிலேயே இதுமாதிரியான நோட்டீஸ் அனுப்பப்பட்டுள்ளது'என்று கூறிய சென்னை உயர் நீதிமன்றம், இந்த நோட்டீஸ் செல்லாது என்று 2003ம் ஆண்டு உத்தரவிட்டார். இதனிடையே கடந்த 2005ல்-சென்னை உயர்நீதிமன்றத்தின் தனிநீதிபதி தீர்ப்பினை எதிர்த்து அமலாக்கத்துறை மேல்முறையீடு செய்தது. இம்மனு மீதான விசாரணை கடந்த ஆகஸ்ட்.,மாதம் விசாரணைக்கு வந்தநிலையில், அனைத்து தரப்பு வாதங்களையும் கேட்டறிந்த நீதிபதிகள் தீர்ப்பின் தேதியினை குறிப்பிடாமல் கடந்த செப்., 14ம்தேதி வழக்கினை ஒத்திவைத்தனர். அதன்படி இன்று(அக்.,20)இதற்கான தீர்ப்பு அளிக்கப்பட்டுள்ளது. அதில், "டி.டி.வி.தினகரன் திவாலாகிவிட்டதாக பிறப்பிக்கப்பட்ட நோட்டீஸ் செல்லாது" என்றுக்கூறியதோடு, அமலாக்கத்துறை தனிநீதிபதியின் தீர்ப்பினை எதிர்த்து மேல்முறையீடு செய்த வழக்கினை தள்ளுபடி செய்து உத்தரவிட்டுள்ளனர்.
