மிக்ஜாம் புயல்: யாருக்கெல்லாம் இன்று விடுமுறை? எந்தெந்த சேவைகள் இன்று இயங்காது?
வங்கக்கடலில் உருவாகியுள்ள மிக்ஜாம் புயல் சென்னைக்கு 50 கி.மீ தொலைவில் தற்போது நிலை கொண்டுள்ளதாக வானிலை ஆய்வு மையம் தெரிவித்துள்ளது. எனவே, சென்னை மற்றும் புதுச்சேரி மக்கள் யாரும் வெளியே வர வேண்டாம் என அறிவுறுத்தப்பட்டுள்ளது. இந்த புயல் காரணமாக, ஆந்திராவின் என்டிஆர் மாவட்டம், புதுச்சேரி, காரைக்கால் மற்றும் யானம் ஆகிய இடங்களில் உள்ள கல்வி நிறுவனங்களுக்கு இன்று முதல் இரண்டு நாட்களுக்கு விடுமுறை அறிவிக்கப்பட்டுள்ளது. இன்று முதல் 5ஆம் தேதி காலை வரை புதுச்சேரி கடற்கரை பகுதிகளில் 144 தடை உத்தரவு பிறப்பிக்கப்பட்டுள்ளது. கடல் சீற்றம் அதிகமாக இருப்பதால் இந்த முடிவு எடுக்கப்பட்டுள்ளது.
சில கடலோர தமிழக மாவட்டங்களுக்கு விடுமுறை
தமிழக கடற்கரையை நோக்கி மிக்ஜாம் புயல் நகர்ந்து வருவதால், சென்னை, திருவள்ளூர், காஞ்சிபுரம் மற்றும் செங்கல்பட்டு மாவட்டங்களில் செயல்படும் வங்கிகள், பொதுத்துறை நிறுவனங்கள் உட்பட அனைத்து நிறுவனங்களுக்கும் இன்று பொது விடுமுறை அறிவிக்கப்ட்டுள்ளது. மேலும், புயல் காரணமாக, சென்னை, செங்கல்பட்டு, காஞ்சிபுரம், திருவள்ளூர், விழுப்புரம், இராணிப்பேட்டை ஆகிய மாவட்டங்களில் உள்ள பள்ளி கல்லூரிகளுக்கு விடுமுறை அறிவிக்கப்பட்டுள்ளது. திருவண்ணாமலை மாவட்டத்தில் செய்யாறு, வந்தவாசி, சேத்துப்பட்டு, வெம்பாக்கம் தாலுகாவை சேர்ந்த பள்ளி கல்லூரிகளுக்கு மட்டும் விடுமுறை அறிவிக்கப்பட்டுள்ளது. சென்னை, திருவள்ளூர், காஞ்சிபுரம், செங்கல்பட்டு ஆகிய மாவட்டங்களில் உள்ள டாஸ்மாக் கடைகளும் இன்று இயங்காது.
சென்னையில் புறநகர் ரயில் சேவைகள் பாதிப்பு; சென்னை-திருச்சி நெடுஞ்சாலை துண்டிப்பு
கனமழை காரணமாக தண்டவாளத்தில் மழைநீர் தேங்கி நிற்பதால் ஒரு மணிநேரத்திற்கு ஒரு முறை மட்டுமே புறநகர் ரயில் இயக்கப்படும் என அறிவிக்கப்பட்டுள்ளது செங்கல்பட்டில் நேற்றிரவு முதல் பெய்து வந்த கனமழையால் கூடுவாஞ்சேரி அருகே உள்ள தேசிய நெஞ்சாலைகளில் தண்ணீர் தேங்கியுள்ளது. அதனால், சென்னை-திருச்சி தேசிய நெடுஞ்சாலையில் போக்குவரத்து துண்டிக்கப்பட்டுள்ளது. தற்போதைக்கு ஒரு பாதை வழியாக சென்னை-திருச்சி வாகனங்கள் அனுப்பப்பட்டு வருகிறது. மெட்ரோ ரயில் சேவை வழக்கம்போல காலை 5 மணிக்கு துவங்கியது. கனமழை பெய்வதால், செயின்ட் தாமஸ் மவுண்ட் மெட்ரோவின் பைக் பார்க்கிங் பகுதியில் வெள்ளநீர் சூழ்ந்துள்ளது. அதுமட்டுமின்றி, இந்த மெட்ரோ ரயில் நிலையம் சுற்றிலும் 4 அடிக்கு நீர் தேங்கி நிற்பதால், பயணிகள் ஆலந்தூர் மெட்ரோவை பயன்படுத்துமாறு மெட்ரோ நிர்வாகம் அறிவுறுத்தியுள்ளது.
சென்னை சென்ட்ரலில் இருந்து புறப்படும் 6 ரயில்கள் ரத்து
பல சாலைகள் வெள்ளத்தில் மூழ்கியுள்ளதால், மக்கள் வீட்டுக்குள்ளேயே இருக்குமாறும், தேவையின்றி வெளியே செல்ல வேண்டாம் என்றும் சென்னை மாநகராட்சி கேட்டுக் கொண்டுள்ளது. டாக்டர் எம்ஜிஆர் சென்னை சென்ட்ரலில் இருந்து புறப்படும் 6 ரயில்கள் ரத்து செய்யப்பட்டுள்ளன. அவை, 1. எம்ஜிஆர் சென்னை சென்ட்ரல்-மைசூரு சதாப்தி எக்ஸ்பிரஸ், 2. சென்னை சென்ட்ரல்-கோவை எக்ஸ்பிரஸ், 3. சென்னை சென்ட்ரல்-கோவை சதாப்தி எக்ஸ்பிரஸ், 4. சென்னை சென்ட்ரல்-கேஎஸ்ஆர் பெங்களூரு ஏசி டபுள் டெக்கர் எக்ஸ்பிரஸ், 5. சென்னை சென்ட்ரல்-கேஎஸ்ஆர் பெங்களூரு பிருந்தாவன் எக்ஸ்பிரஸ், 6. சென்னை சென்ட்ரல்-திருப்பதி சப்தகிரி எக்ஸ்பிரஸ்.
சென்னையில் உள்ள சில சுரங்கப்பாதைகள் மற்றும் பாலங்கள் மூடல்
இதனால், சென்னை முழுவதும் பல இடங்களில் மழை பெய்ய தொடங்கியுள்ளது. அபாய அளவைத் தாண்டி தண்ணீர் பாய்வதால், பாதுகாப்பு காரணங்களுக்காக பேசின் பாலம் மற்றும் வியாசர்பாடி இடையே உள்ள பாலம் எண்.14 ஆகியவை தற்காலிகமாக மூடப்பட்டுள்ளன. மேலும், கெங்குரெட்டி சுரங்கப்பாதை, சைதாப்பேட்டை-அரங்கநாதன் சுரங்கப்பாதை, மேட்லி சுரங்கப்பாதை, தில்லைநகர், சி.பி.சாலை, வில்லிவாக்கம், வியாசர்பாடி, செம்பியம், கணேசபுரம் ரங்கராஜபுரம், பழவந்தாங்கல், ஆகிய இடங்களில் உள்ள சுரங்கப்பாதைகள் மூடப்பட்டுள்ளன. மிக்ஜாம் புயலின் தாக்கம் காரணமாக டிசம்பர் 5 ஆம் தேதி வரை மழையின் தீவிரம் அதிகரிக்கும் என சென்னை வானிலை ஆய்வு மையம் தெரிவித்துள்ளது. செங்கல்பட்டு, காஞ்சிபுரம், திருவள்ளூர் உள்ளிட்ட பகுதிகளிலும் அதிகமாக கனமழை பெய்ய இருக்கிறது.
