சோனியா காந்தி திடீர் உடல்நலக்குறைவு: டெல்லி கங்காராம் மருத்துவமனையில் அனுமதி
செய்தி முன்னோட்டம்
இந்திய தேசிய காங்கிரஸ் கட்சியின் பாராளுமன்றக் குழுத் தலைவரும், ராஜஸ்தான் மாநிலங்களவை உறுப்பினருமான சோனியா காந்தி (79), நெஞ்சுப்பகுதி தொடர்பான உடல்நலக்குறைவு காரணமாக டெல்லியில் உள்ள சர் கங்கா ராம் மருத்துவமனையில் அனுமதிக்கப்பட்டுள்ளார். மருத்துவர் அனூப் பாசு தலைமையிலான மருத்துவக் குழுவினர் சோனியா காந்தியின் உடல்நிலையைக் கண்காணித்து வருகின்றனர். தற்போது அவரது உடல்நிலை சீராக இருப்பதாக மருத்துவமனை நிர்வாகம் தெரிவித்துள்ளது. சோனியா காந்தியுடன் அவரது மகள் பிரியங்கா காந்தி மருத்துவமனையில் தங்கியிருந்து கவனித்து வருகிறார்.
உடல்நலம்
தொடரும் உடல்நலச் சிக்கல்கள்
கடந்த சில காலங்களாகவே சோனியா காந்தி சுவாசக் கோளாறுகளால் பாதிக்கப்பட்டு வருகிறார். கடந்த ஜனவரி மாதம் குளிர் மற்றும் சுற்றுச்சூழல் மாசு காரணமாக 'பிராங்கியல் ஆஸ்துமா' அதிகரித்ததால் இதே மருத்துவமனையில் சிகிச்சை பெற்றார். முன்னதாக கடந்த ஆண்டு வயிற்றில் ஏற்பட்ட தொற்று காரணமாகச் சிகிச்சை பெற்றார். முறையான மருத்துவப் பரிசோதனைக்காக அமெரிக்கா சென்றிருந்தார். அப்போது ராகுல் காந்தி அவருடன் சென்றிருந்தார் என்பது குறிப்பிடத்தக்கது.
அரசியல்
அரசியல் பின்னணி
1998 முதல் 2017 வரையிலும், பின்னர் 2019 முதல் 2022 வரையிலும் காங்கிரஸ் கட்சியின் தலைவராக நீண்ட காலம் பணியாற்றிய சோனியா காந்தி, தற்போது முதுமை மற்றும் உடல்நலக் குறைவு காரணமாகப் பொது நிகழ்ச்சிகளில் அதிகம் பங்கேற்பதில்லை. தற்போது அவர் அனுமதிக்கப்பட்டுள்ள செய்தி வெளியானதை அடுத்து, பல்வேறு அரசியல் தலைவர்களும் அவர் விரைவில் குணமடைய வேண்டித் தங்களது கருத்துகளைத் தெரிவித்து வருகின்றனர்.