காவிரி நீர் விவகாரம் - டெல்டா பாசனத்திற்கு மேட்டூர் அணையிலிருந்து நீர் திறந்துவிடப்படும் என எதிர்பார்ப்பு
கர்நாடகா மாநிலம் குடகு பகுதியில் உருவாகும் காவிரி, தமிழகத்தில் பல பிரிவுகளாக பிரிந்து இறுதியில் கடலில் சென்று கலக்கிறது. இந்த காவிரியில் தமிழகத்திற்கும் உரிமை உள்ள நிலையில், அதனை மறுத்து தொடர்ந்து பிரச்சனை செய்து வருகிறது கர்நாடகா. 50 ஆண்டுகளுக்கு மேலாக இந்த பிரச்சனை நிலவி வருகிறது. இதற்காக காவிரி மேலாண்மை ஆணையம், ஒழுங்காற்று குழு உள்ளிட்டவை உருவாக்கப்பட்டும் பயனில்லை.
உச்சநீதிமன்றம் உத்தரவிட்டும் தண்ணீரை திறந்து விடாத கர்நாடக அரசு
உச்ச நீதிமன்றம் தமிழகத்திற்கு தண்ணீர் திறந்து விடும்படி உத்தரவிட்டும் இந்தாண்டு குறைந்த அளவிலான தண்ணீரை மட்டுமே கர்நாடகா அரசு திறந்துவிட்டது. இதனால் குறுவை சாகுபடி முற்றிலும் பாதிப்படைந்தது. காவிரி நீர் வராததால் மேட்டூர் அணையின் நீர்மட்டம் சரசரவென குறைந்தது. நவம்பர் 1ம் தேதி முதல் 23ம் தேதி வரை தமிழகத்திற்கு வினாடிக்கு 2600 கனஅடி தண்ணீர் திறந்துவிடப்பட்டிருக்க வேண்டும். ஆனால் திறக்கப்படவில்லை.
காவிரி நீர்ப்பிடிப்பு பகுதிகளில் கனமழை
இந்நிலையில் கடந்த 2 வாரங்களாக காவிரி நீர்ப்பிடிப்பு பகுதிகளில் தொடர்ந்து கனமழை பெய்து வருகிறது. இதன் காரணமாக மேட்டூர் அணைக்கான நீர்வரத்தும் கணிசமாக உயர்ந்தது. தற்போது சற்று மழை குறைந்துள்ளதால் அணைக்கான நீர்வரத்தும் குறைந்துள்ளது. மழை காரணமாக கர்நாடகாவின் கிருஷ்ணா சாகர் அணையிலிருந்து வினாடிக்கு 1,542 கனஅடி நீர் திறந்துவிடப்படுகிறது. அதேபோல் வினாடிக்கு 800 கனஅடி நீர் கபினி அணையில் இருந்து திறந்துவிடப்படுகிறது.
மேட்டூர் அணையின் நீர்மட்டம் உயர்வு
இதன் காரணமாக மேட்டூர் அணையின் நீர்மட்டம் நேற்றைய நிலவரப்படி 60.41 அடியாக இருந்த நிலையில், இன்று(நவ.,16) 60.74 அடியாக உயர்ந்துள்ளது. அணையின் நீர் இருப்பு 25.24 டி.எம்.சி.ஆக உள்ளது. குடிநீர் தேவைக்காக மட்டும் வினாடிக்கு 250 கனஅடி நீர் திறந்துவிடப்படுகிறது. அண்மையில் பெய்த கனமழை காரணமாக இன்னும் சில தினங்களுக்கு சம்பா சாகுபடிக்கு, அணையிலிருந்து நீர் தேவையில்லை என்னும் சூழல் நிலவுகிறது.
டெல்டா சம்பா பாசனத்திற்கு நீர் திறந்துவிடப்படலாம் என எதிர்பார்ப்பு
அதனால் தமிழ்நாடு மாநிலத்தின் மேட்டூர் அணையில் நீரினை மேலும் தேக்கி வைத்து, நீர்மட்டம் உயர்ந்த பின்னர் டெல்டா சம்பா பாசனத்திற்கு திறந்துவிடப்படலாம் என்று எதிர்பார்க்கப்படுகிறது. மழையின் அளவு, காவிரி நீர்ப்பிடிப்பு பகுதிகளில் அண்மையில் குறைந்துள்ள நிலையில், அணைக்கான நீர்வரத்து வினாடிக்கு 3,320 கன அடியிலிருந்து தற்போது 3,239 கன அடியாக குறைந்துள்ளது என்று தகவல்கள் வெளியாகியுள்ளது.
