கல்லூரிகளில் ராகிங் தடுப்பு குழு கட்டாயம் அமைக்க உத்தரவு
கோவை தனியார் கல்லூரி ஒன்றில் மாணவர் ஒருவரை 7 சீனியர் மாணவர்கள் ராகிங் செய்த விவகாரத்தில் அவர்கள் கல்லூரியில் இருந்து இடைநீக்கம் செய்யப்பட்டதுடன் கைது செய்யப்பட்ட சம்பவம் பெரும் பரபரப்பினை ஏற்படுத்தியது. இந்நிலையில் அனைத்து கல்லூரிகளிலும் ராகிங் தடுப்பு குழுவினை கட்டாயம் அமைக்கவேண்டும் என்று கல்லூரி கல்வி இயக்குனர் கீதா சுற்றறிக்கை அனுப்பியுள்ளார். அதில், கல்லூரியில் மாணவர்கள் இடையே ராகிங் நடக்காதபடி, உச்ச நீதிமன்றம் தெரிவித்துள்ள வழிகாட்டு நெறிமுறைகளை பின்பற்றி செயல்பட அறிவுறுத்தப்பட்டுள்ளது. அதன்படி ராகிங் நடப்பதற்கு முன்னரே எச்சரிக்கை நடவடிக்கைகள் மேற்கொள்ளவேண்டும். கல்லூரிகளில் கட்டாயம் ராகிங் தடுப்புக்குழு அமைக்க வேண்டும். ராகிங் குறித்த புகார்களை உடனடியாக தெரிவிக்க ஆசிரியர்களின் பெயர்கள், தொலைபேசி எண்கள் உள்ளிட்டவை அறிவிப்பு பலகையில் வைத்திருக்கவேண்டும் என்று கூறப்பட்டுள்ளது.
ஆய்வு மேற்கொண்டு ஒரு வாரத்தில் அறிக்கை அளிக்க வேண்டும் என உத்தரவு
மேலும், ராகிங் கொடுமையினை முழுமையாக ஒழிக்க ராகிங் புகார் பெட்டி, ஆலோசனைப்பெட்டி உள்ளிட்டவைகளை வைப்பதோடு, அதில் வரும் புகார்கள் குறித்து கல்லூரி முதல்வர் மற்றும் துறைத்தலைவர்கள் ஒன்றாகக்கூடி ஆலோசித்து தக்க நடவடிக்கைகளை மேற்கொள்ள வேண்டும் என்றும் கூறப்பட்டுள்ளது. தொடர்ந்து, கடந்த 2019ம்-ஆண்டு அரசு கடிதத்தில் குறிப்பிடப்பட்டுள்ளவாறு மகாராஷ்டிரா அரசின்கீழ் செயல்படும் கல்லூரிகளில் அமைக்கப்பட்டுள்ள ராகிங் தடுப்புக்குழுவில் கல்லூரி தலைவர், துறைசார்ந்தத்தலைவர்கள், காவல்துறை, செய்தித்துறை, பொதுத்துறையின் முக்கிய தலைவர்கள், மாணவர்கள், மாணவர்களின் பெற்றோர்கள் இருப்பது போன்று தமிழ்நாடு கல்லூரிகளிலும் அமைக்கப்பட வேண்டும் என்று சுற்றறிக்கையில் குறிப்பிடப்பட்டுள்ளது. அதேபோல் அடுத்த ஒரு வாரத்திற்குள் இது தொடர்பாக ஆய்வுகள் மேற்கொள்ளப்பட்டு அரசு, அரசு உதவி பெறும் மற்றும் சுயநிதி கல்லூரிகளில் இருந்து அறிக்கை அனுப்பப்படவேண்டும் என்றும் தெரிவிக்கப்பட்டுள்ளது.
