ரூ. 100 கோடி பள்ளி ஊழல் வழக்கு: முன்னாள் அமைச்சர் அன்பில் மகேஸுக்கு நவ. 4 வரை போலீஸ் காவல்

எழுதியவர் Venkatalakshmi V

Nov 02, 2026

02:42 pm

செய்தி முன்னோட்டம்

திமுக ஆட்சி காலத்தில் 1,000-க்கும் மேற்பட்ட தனியார் பள்ளிகளுக்கு நிரந்தர அங்கீகாரம் மற்றும் சிஎம்டிஏ, டிடிசிபி அனுமதிகளை பெற்று தருவதாகக் கூறி ரூ. 100 கோடிக்கு மேல் சட்டவிரோதமாக வசூலித்ததாக தொடரப்பட்ட ஊழல் வழக்கில், முன்னாள் பள்ளிக்கல்வித் துறை அமைச்சர் அன்பில் மகேஷ் 3 நாட்கள் போலீஸ் காவலில் எடுத்து விசாரிக்க சிறப்பு நீதிமன்றம் அனுமதியளித்துள்ளது. தனியார் பள்ளிகள் கூட்டமைப்புச் செயலாளர் அளித்த புகாரின் பேரில் சென்னை மத்திய குற்றப்பிரிவு (CCB) போலீசார் வழக்குப் பதிவு செய்து, கடந்த அக்டோபர் 26-ஆம் தேதி அன்பில் மகேஷை கைது செய்தனர்.

காவல்

5 நாட்கள் காவல் கோரிய காவல்துறை, நீதிமன்றம் 3 நாட்கள் அனுமதி

சென்னை ஊழல் தடுப்பு சிறப்பு நீதிமன்றத்தில் அன்பில் மகேஷை 5 நாட்கள் போலீஸ் காவலில் எடுத்து விசாரிக்க மத்திய குற்றப்பிரிவு போலீசார் மனு தாக்கல் செய்திருந்தனர்.

இரு தரப்பு வாதங்களையும் கேட்டறிந்த நீதிபதி, தீர்ப்பை நவம்பர் 2-ஆம் தேதிக்கு ஒத்திவைத்திருந்தார்.

இன்று நீதிமன்றத்தில் ஆஜர்படுத்தப்பட்ட அன்பில் மகேஷை வரும் நவம்பர் 4-ஆம் தேதி வரை 3 நாட்கள் காவலில் வைத்து விசாரிக்க காவல்துறைக்கு அனுமதி வழங்கி உத்தரவிட்டார்.

தனியார் பள்ளிகள் சங்கத் தலைவர் பி.டி. அரசகுமாருடன் இணைந்து ரூ. 100 கோடிக்கு மேல் 'கட்சி நிதி' என்ற பெயரில் வசூலித்ததாகக் கூறப்படும் பணப் பரிவர்த்தனைகள் மற்றும் இதில் தொடர்புடைய முக்கிய நபர்கள் குறித்து விசாரிக்கவே இக்காவல் கோரப்பட்டதாக காவல்துறை சார்பில் தெரிவிக்கப்பட்டது.