சர்வதேச பிசினஸ் ரியாலிட்டி ஷோ: தொகுப்பாளராக களம் இறங்கும் நடிகர் மாதவன்!
செய்தி முன்னோட்டம்
தமிழ் மற்றும் இந்தியத் திரையுலகின் முன்னணி நட்சத்திர நடிகரும் இயக்குநருமான ஆர். மாதவன், தொலைக்காட்சி மற்றும் டிஜிட்டல் திரையில் மீண்டும் ஒரு பிரம்மாண்ட ரியாலிட்டி ஷோவை தொகுத்து வழங்கத் தயாராகி வருகிறார். ஆப்டிமிஸ்டிக்ஸ் என்டர்டெயின்மென்ட் நிறுவனம் சர்வதேச அளவில் தயாரிக்கும் 'கேம் சேஞ்சர்ஸ்' என்ற பிசினஸ் ரியாலிட்டி ஷோவின் தொகுப்பாளராக அவர் அதிகாரப்பூர்வமாக ஒப்பந்தம் செய்யப்பட்டுள்ளார். மத்திய கிழக்கு சந்தையை மையமாகக் கொண்டு துபாயில் முழுவீச்சில் தயாரிக்கப்பட உள்ள இந்த நிகழ்ச்சி, உலகளாவிய ஸ்டார்ட் அப் நிறுவனங்களையும், சர்வதேச முதலீட்டாளர்களையும் ஒரே மேடையில் இணைக்கும் வகையில் பிரம்மாண்டமாக வடிவமைக்கப்பட்டுள்ளது.
சர்வதேச முதலீட்டாளர்கள்
ஸ்டார்ட் அப் நிறுவனங்கள்
இவ்விழாவில் துபாய், லண்டன், ரஷ்யா மற்றும் அமெரிக்கா உள்ளிட்ட பல்வேறு உலக நாடுகளைச் சேர்ந்த முன்னணி முதலீட்டாளர்கள் நடுவர் குழுவாகப் பங்கேற்கின்றனர்.
உலகெங்கிலும் இருந்து தேர்ந்தெடுக்கப்படும் திறமையான தொழில்முனைவோர், தங்களது புதுமையான வணிக யோசனைகளை இந்த சர்வதேச முதலீட்டாளர்கள் குழுவின் முன் சமர்ப்பித்து முதலீடுகளை ஈர்க்கப் போட்டியிடுவர்.
இது வழக்கமான பிசினஸ் பிட்ச் நிகழ்ச்சியாக இல்லாமல், தொழில்முனைவோரின் வியூகங்கள், தனிப்பட்ட விடாமுயற்சி மற்றும் சவால்களைத் திரையில் வெளிப்படுத்தும் உயர்தர உலகளாவிய பொழுதுபோக்கு நிகழ்ச்சியாக இருக்கும் என்று தயாரிப்பாளர்கள் தெரிவித்துள்ளனர்.
நடிகர் மாதவன்
தொலைக்காட்சித் தொகுப்பாளர்
நடிகர் மாதவன் ஒரு தொலைக்காட்சி தொடர் அல்லது நிகழ்ச்சியை தொகுத்து வழங்குவது இது முதல் முறையல்ல.
கடந்த 1997-ஆம் ஆண்டு வெளியான 'தோல் மோல் கே போல்' நிகழ்ச்சியை ஆரம்ப கட்டத்தில் தொகுத்து வழங்கினார்.
பின்னர் சோனி தொலைக்காட்சியின் புகழ்பெற்ற 'டீல் ஆர் நோ டீல்' மற்றும் 2010-ல் இமேஜின் டிவியின் 'பிக் மணி' ஆகிய நிகழ்ச்சிகளைத் தொகுத்து வழங்கி மக்கள் மத்தியில் பெரும் வரவேற்பைப் பெற்றார்.
தற்போது நீண்ட இடைவேளைக்குப் பிறகு, உலகத்தரம் வாய்ந்த ஒரு வணிக ரியாலிட்டி நிகழ்ச்சியின் மூலம் அவர் மீண்டும் தொகுப்பாளராக களமிறங்குவது ரசிகர்கள் மத்தியிலும் தொழில் துறையினரிடையேயும் பெரும் எதிர்பார்ப்பை ஏற்படுத்தியுள்ளது.