நிலவுக்கு அடியில் ஒரு ரகசிய உலகம்! பிரம்மாண்ட குகைக்கு செல்லும் மர்மக் குழி; நாசா தகவல்
செய்தி முன்னோட்டம்
நிலவின் மேற்பரப்பில் காணப்படும் ஆழமான மர்மக் குழி ஒன்று, அதன் அடியில் அமைந்துள்ள பிரம்மாண்டமான குகை போன்ற அமைப்போடு இணைக்கப்பட்டிருக்கலாம் என நாசா விஞ்ஞானிகள் தெரிவித்துள்ளனர். நிலவின் பழமையான எரிமலைப் பகுதியான மேரியஸ் ஹில்ஸ் மண்டலத்தில் இந்த மர்மக் குழி அமைந்துள்ளது. நிலவின் அடியில் என்ன மறைந்துள்ளது என்பதைக் கண்டறிய நாசா விண்வெளி ஆராய்ச்சி மையம் தற்போது தீவிர தயாரிப்புப் பணிகளை மேற்கொண்டு வருகிறது.
லாவா குழாய்கள்
லாவா குழாய்கள் மற்றும் குகைகள் எவ்வாறு உருவாகின்றன?
பில்லியன் கணக்கான ஆண்டுகளுக்கு முன்பு நிலவில் எரிமலைகள் சீறியபோது, உருகிய பாறைக்குழம்பு நிலப்பரப்பின் அடியில் பாய்ந்து சென்றது.
அந்த லாவா மேலடுக்கு குளிர்ந்து உறைந்த பிறகும், அடியில் குழம்புத் தாரை தொடர்ந்து பாய்ந்து சென்றதால் காலப்போக்கில் காலியான சுரங்கப் பாதைகள் உருவாயின.
இவையே லாவா குழாய்கள் என அழைக்கப்படுகின்றன.
இந்த லாவா சுரங்கங்களின் மேல்கூரை உடைந்து உருவாகும் திறப்புகளே தற்போதைய மர்ம குழிகளாக காட்சியளிக்கின்றன.
விண்வெளி வீரர்கள்
விண்வெளி வீரர்களுக்கான இயற்கை பாதுகாப்புப் புகலிடம்
நிலவில் வளிமண்டலம் இல்லாததால் அதன் மேற்பரப்பு கொடூரமான வெப்பநிலை மாற்றங்கள், ஆபத்தான சூரியக் கதிர்வீச்சுகள் மற்றும் சிறு விண்கற்களின் மோதல்களுக்கு நேரடியாக உட்படுகிறது.
ஆனால் நிலவின் அடியில் உள்ள குகைகள் இத்தகைய பேராபத்துகளில் இருந்து இயற்கையான பாதுகாப்பை வழங்கக்கூடியவை ஆகும்.
எதிர்காலத்தில் நிலவுக்கு செல்லும் விண்வெளி வீரர்கள் தங்குவதற்கும், தங்களின் அதிநவீன விண்வெளி உபகரணங்களை பாதுகாப்பாக வைப்பதற்கும் இத்தகைய இயற்கைக் குகைகள் பெரும் புகலிடமாக அமையும் என எதிர்பார்க்கப்படுகிறது.
நிலவின் ரகசியங்கள்
நிலவின் வரலாற்று ரகசியங்களை அறியும் முயற்சி
இந்த மர்மக் குழி வெறும் ஆழமான பள்ளமா அல்லது பிரம்மாண்ட குகை அமைப்பின் நுழைவுவாயிலா என்பதை புதிய விண்கலன்கள் மூலம் ஆய்வு செய்ய நாசா திட்டமிட்டுள்ளது.
நிலவின் மேற்பரப்பு பாறைகளை விட இந்த குகைகளின் உட்புறத்தில் உள்ள பாறைகள் வெளிப்புறக் கதிர்வீச்சுகளால் பாதிக்கப்படாமல் மூல வடிவிலேயே இருக்கும்.
எனவே இந்த குகைகளை ஆய்வு செய்வதன் மூலம் நிலவின் தோற்றம், அதன் உள் கட்டமைப்பு மற்றும் எரிமலை வரலாறு குறித்த பல்வேறு அறிவியல் புதிர்களுக்கு விடை காண முடியும் என நாசா நம்புகிறது.