நடிகர் சங்க அறிக்கை குறித்து, நாசரிடம் தொலைபேசியில் மன்சூர் அலிகான் வாக்குவாதம்
நடிகை திரிஷா குறித்து சர்ச்சையான கருத்துக்களை தெரிவித்ததற்காக, நடிகர் மன்சூர் அலிகானுக்கு, நடிகர் சங்கம் கண்டனங்களை தெரிவித்திருந்தது. இந்நிலையில், தனது தரப்பு விளக்கத்தை கேட்காமல் அறிக்கை வெளியிட்டதாக கூறி, நடிகர் சங்க தலைவர் நாசரிடம், மன்சூர் அலிகான் தொலைபேசியில் வாக்குவாதம் செய்யும் காட்சிகள் வைரல் ஆகி வருகிறது. தற்போது பரவி வரும் அந்த காணொளியில் மன்சூர் அலிகான், "மன்சூர் அலிகான் மன்னிப்பு கேட்டால் மட்டுமே நடிகர் சங்கத்தில் சேர்த்துக் கொள்ளப்படுவார் என பரவி வருகிறது. என்னிடம் கேட்காமல் எப்படி நீங்கள் அறிக்கை வெளியிடலாம்?" "நடிகர் சங்கத்திலிருந்து ஏன் என்னை யாரும் இது குறித்து கேட்கவில்லை. நான் என்னை இறந்து விட்டேனா?"
நாசரிடம் வாக்குவாதத்தில் ஈடுபட்ட மன்சூர் அலிகான்
தொடர்ந்து சில ஆட்சேபனைக்குரிய வார்த்தைகளை பயன்படுத்தும் மன்சூர் அலிகான், நாசரிடம் "நான் இதை விடமாட்டேன், இது பெரிய பிரச்சனையாகும்" என எச்சரிக்கும் தொனியில் பேசுகிறார். இதற்கு பதிலளிக்கும் நாசர், மன்சூர் அலிகான் மீது நடவடிக்கை எடுக்கவில்லை என தெளிவுபடுத்துகிறார். ஆனால் மன்சூர் அலிகான், அறிக்கை வெளியிட்டதை நடவடிக்கை என கூறி வாக்குவாதத்தில் ஈடுபடுகிறார். திரிஷா குறித்த சர்ச்சை கருத்துக்கள் தொடர்பாக நேற்று பத்திரிகையாளர்களை சந்தித்த மன்சூர் அலிகான், மன்னிப்பு கேட்பதை திட்டவட்டமாக மறுத்துள்ளார். மேலும், தன் திரைப்படம் வெளியாக உள்ள நேரத்தில் அதை சீர்குலைப்பதற்கான நடவடிக்கைகள் மேற்கொள்ளப்படுவதாகவும் தெரிவித்திருந்தது குறிப்பிடத்தக்கது.
