தயாரிப்பாளராக அவதாரம் எடுத்த நடிகர் அஜித்: தென்னிந்திய திரைப்பட வர்த்தக சபையில் புதிய நிறுவனம் பதிவு
செய்தி முன்னோட்டம்
தமிழ் திரையுலகின் முன்னணி நட்சத்திரமான நடிகர் அஜித் குமார், தற்போது தயாரிப்புத் துறையிலும் அதிகாரப்பூர்வமாக தடம் பதித்துள்ளார். 'அஜித்குமார் ஸ்போர்ட்ஸ் சர்வீஸ் எல்.எல்.சி' என்ற பெயரில் புதிய திரைப்படத் தயாரிப்பு நிறுவனத்தை அவர் தென்னிந்திய திரைப்பட வர்த்தக சபையில் பதிவு செய்துள்ளார். கடந்த 30 ஆண்டுகளுக்கும் மேலாகத் திரையுலகில் நடிகராக முத்திரை பதித்து வரும் அஜித், தற்போது தனது சொந்த நிறுவனத்தின் மூலம் திரைப்படங்களை தயாரிக்கத் திட்டமிட்டுள்ளார். ஏற்கனவே பல முன்னணி நடிகர்கள் சொந்தமாக தயாரிப்பு நிறுவனங்களை நடத்தி வரும் நிலையில், அஜித்தின் இந்த முடிவு அவரது ரசிகர்களிடையே பெரும் உற்சாகத்தை ஏற்படுத்தியுள்ளது.
எதிர்காலத் திட்டங்கள்
ஸ்போர்ட்ஸ் ஆவணப்படத்தை தயாரிக்கும் முயற்சியா?
நடிகர் அஜித்தின் கார் ரேஸிங் பற்றிய ஆவணப்படத்தை பிரபல இயக்குனர் AL விஜய் இயக்கி வருகிறார் என்ற செய்தி சில நாட்களுக்கு முன்னர் வெளியானது. ஒருவேளை அஜித் அந்த படத்தை தயாரித்து வெளியிடவே இந்த தயாரிப்பு நிறுவனத்தை பதிவு செய்திருக்கிறாரா என்ற கேள்வியும் ரசிகர்கள் மனதில் எழுந்துள்ளது. தற்போது அஜித் குமார் 'விடாமுயற்சி' மற்றும் 'குட் பேட் அக்லி' ஆகிய படங்களில் தீவிரமாக நடித்து வருகிறார். இந்தப் படங்களைத் தொடர்ந்து, தனது சொந்த தயாரிப்பு நிறுவனத்தின் மூலம் அவர் புதிய படங்களைத் தயாரிக்க வாய்ப்புள்ளதாக கூறப்படுகிறது. விரைவில் இந்தப் புதிய நிறுவனத்தின் கீழ் உருவாகும் முதல் படம் குறித்த அதிகாரப்பூர்வ அறிவிப்பு வெளியாகும் எனத் தெரிகிறது.