வாரத்தின் முதல் நாளிலேயே சென்செக்ஸ் 900 புள்ளிகள் சரிந்து ரூ.6 லட்சம் கோடி நஷ்டம்! முதலீட்டாளர்களுக்கு பேரதிர்ச்சி

எழுதியவர் Sekar Chinnappan

Sep 28, 2026

10:52 am

செய்தி முன்னோட்டம்

இந்திய பங்குச் சந்தைகள் திங்கட்கிழமை (செப்டம்பர் 28) வர்த்தகத் தொடக்கத்திலேயே கடும் சரிவை சந்தித்தன. மும்பை பங்குச்சந்தையின் குறியீட்டு எண் சென்செக்ஸ் 900.50 புள்ளிகள் சரிந்து 72,995.24 என்ற அளவிலும், தேசியப் பங்குச் சந்தையின் நிஃப்டி 275.45 புள்ளிகள் சரிந்து 22,865.05 என்ற அளவிலும் வர்த்தகமாகின. இதனால் பிஎஸ்இ பட்டியலிடப்பட்ட நிறுவனங்களின் மொத்த சந்தை மதிப்பு ரூ.483.25 லட்சம் கோடியிலிருந்து ரூ.477.08 லட்சம் கோடியாகக் குறைந்து, ஒரே நாளில் முதலீட்டாளர்களுக்கு சுமார் ரூ.6.17 லட்சம் கோடி நஷ்டம் ஏற்பட்டது.

கச்சா எண்ணெய்

கச்சா எண்ணெய் விலை உயர்வு மற்றும் பணவீக்கப் பயம்

சந்தையின் திடீர் வீழ்ச்சிக்கு முதன்மை காரணியாக கச்சா எண்ணெய் விலை உயர்வு அமைந்துள்ளது.

அமெரிக்கா-ஈரான் இடையேயான பேச்சுவார்த்தை முட்டுக்கட்டை மற்றும் ஹார்முஸ் ஜலசந்தி பதற்றத்தால் ப்ரெண்ட் கச்சா எண்ணெய் விலை பேரலுக்கு 106.61 டாலராக உயர்ந்தது.

கச்சா எண்ணெய் தேவையில் பெரும்பாலானவற்றை இறக்குமதி செய்யும் இந்தியாவிற்கு, இது பணவீக்கத்தை அதிகரித்து ரூபாய் மதிப்பில் பெரும் அழுத்தத்தை உண்டாக்கும்.

மேலும் அமெரிக்க 10 ஆண்டு பத்திர வட்டி விகிதம் 5.2 சதவீதமாக உயர்ந்ததும் சந்தையில் சரிவை ஏற்படுத்தியுள்ளது.

பங்குகள்

வங்கி மற்றும் நிதியியல் துறைப் பங்குகளின் கடும் சரிவு

காப்பீட்டு ஒழுங்குமுறை ஆணையமான ஐஆர்டிஏஐ காப்பீட்டு முகவர்களுக்கான கமிஷன் அமைப்பில் மாற்றங்களைக் கொண்டு வர முன்மொழிந்துள்ளது.

இதனால் காப்பீட்டுத் துறையோடு தொடர்புடைய வங்கிகள் மற்றும் நிதியியல் நிறுவனங்களின் வருவாய் பாதிக்கும் என்ற அச்சம் எழுந்துள்ளது.

இதன் விளைவாக பஜாஜ் ஃபைனான்ஸ், கோடக் மஹிந்திரா வங்கி, எச்டிஎஃப்சி வங்கி மற்றும் ஐசிஐசிஐ வங்கி உள்ளிட்ட முக்கிய நிதியியல் பங்குகள் 1 முதல் 1.5 சதவீதம் வரை கடுமையான சரிவை சந்தித்தன.

வெளிநாட்டு முதலீடு

வெளிநாட்டு முதலீட்டாளர்களின் (FPI) தொடர் விற்பனை அழுத்தம்

அமெரிக்க பத்திர வட்டி விகித உயர்வால் வெளிநாட்டு போர்ட்ஃபோலியோ முதலீட்டாளர்கள் (FPI) இந்திய சந்தையிலிருந்து தங்களது முதலீடுகளைத் தொடர்ந்து வெளியேற்றி வருகின்றனர்.

செப்டம்பர் 2026-ல் மட்டும் FPI-கள் சுமார் ரூ.19,000 கோடி மதிப்பிலான பங்குகளை விற்றுள்ளனர்.

இந்த ஆண்டில் அவர்களின் மொத்த விற்பனை ரூ.2.5 லட்சம் கோடியைக் கடந்துள்ளது.

மிட்கேப் மற்றும் ஸ்மால்கேப் குறியீடுகளும் 1 சதவீதத்திற்கு மேல் சரிவடைந்துள்ள நிலையில், இந்தியாவின் பொருளாதாரம் வலுவாக இருந்தாலும் சர்வதேச அழுத்தங்களால் சந்தை தொடர்ந்து சரிவை சந்தித்து வருகிறது.