ரூ.25 லட்சம் இருந்தா போதும்! செபியின் புதிய PMS விதிகளால் முதலீட்டாளர்களுக்குக் கிடைக்கும் சூப்பர் வாய்ப்புகள்
செய்தி முன்னோட்டம்
இந்திய பங்குகள் மற்றும் பரிவர்த்தனை வாரியம் (செபி), போர்ட்ஃபோலியோ மேலாண்மை சேவைகளுக்கான (PMS) புதிய ஒழுங்குமுறை விதிமுறைகளை அமல்படுத்தியுள்ளது. இந்த திருத்தப்பட்ட புதிய சட்டத்தின் மூலம், தொழில்முறை நிபுணர்களால் நிர்வகிக்கப்படும் முதலீட்டு சந்தை கணிசமாக விரிவடையும் என்றும், தனிப்பட்ட பங்குகளைத் தேர்வு செய்யும் பாரம்பரிய முறையிலிருந்து விலகி, பரந்த அசெட் அலோகேஷன் (Asset Allocation) மற்றும் போர்ட்ஃபோலியோ மேலாண்மையை நோக்கி முதலீட்டாளர்கள் நகர இது வழிவகுக்கும் என்றும் சந்தை நிபுணர்கள் கருதுகின்றனர். கூடுதல் விபரங்கள் இங்கே:-
₹25 லட்சம் வரம்பு
PRIM பாதையின் மூலம் நடுத்தர முதலீட்டாளர்களுக்கு வாய்ப்பு
புதிய விதிகளின் மிக முக்கிய அம்சமாக PRIM (Portfolio Managers Route for Investing in Mutual Fund units) என்ற புதிய பரஸ்பர நிதி சார்ந்த போர்ட்ஃபோலியோ சேவை அறிமுகப்படுத்தப்பட்டுள்ளது.
இதன் மூலம், வழக்கமான PMS-க்கான குறைந்தபட்ச முதலீட்டு வரம்பான ₹50 லட்சத்திலிருந்து பாதியாகக் குறைக்கப்பட்டு ₹25 லட்சமாக நிர்ணயிக்கப்பட்டுள்ளது.
இதன் மூலம் SIP மற்றும் கூட்டு வட்டி வளர்ச்சி வாயிலாக தங்களது சேமிப்பை உயர்த்தியுள்ள உயர் நடுத்தரப் பிரிவு முதலீட்டாளர்கள், தொழில்முறை போர்ட்ஃபோலியோ மேலாளர்களின் சேவையை மிக எளிதாகப் பெற முடியும்.
பாதுகாப்பு அம்சங்கள்
விகிதாச்சார கட்டணம் மற்றும் பாதுகாப்பு அம்சங்கள்
PRIM கட்டமைப்பின் கீழ், போர்ட்ஃபோலியோ மேலாளர்கள் வாடிக்கையாளர்களுக்காக நேரடி பரஸ்பர நிதி (Direct Mutual Funds), ETF-கள், இன்டெக்ஸ் ஃபண்டுகள் மற்றும் SIF-களில் மட்டுமே முதலீடு செய்ய முடியும்.
இந்த சேவைக்கான மேலாண்மைக் கட்டணம் AUM-இல் அதிகபட்சமாக 1% என வரம்பிடப்பட்டுள்ளது.
மேலும், போர்ட்ஃபோலியோ மேலாளர்கள் தங்களின் சொந்தக் குழுமத்தை சேர்ந்த AMC பரஸ்பர நிதிகளில் 25%-க்கு மேல் முதலீடு செய்யக் கூடாது என்ற கண்டிப்பான விதியும் சேர்க்கப்பட்டுள்ளதால், நலன் சார்ந்த மோதல்கள் தவிர்க்கப்படும்.
ஐபிஓ வாய்ப்புகள்
₹50 லட்சம் முதலீட்டாளர்களுக்கு சர்வதேச சந்தை மற்றும் IPO வாய்ப்புகள்
வழக்கமான ₹50 லட்சம் வரம்பை பூர்த்தி செய்யும் உயர் நிகர மதிப்புடைய முதலீட்டாளர்களுக்கு புதிய விதிகளின் கீழ் பரந்த முதலீட்டு வாய்ப்புகள் வழங்கப்பட்டுள்ளன.
இதில் சர்வதேச பங்குகள், வெளிநாட்டு அரசுப் பத்திரங்கள், பட்டியலிடப்படாத முதலீட்டுத் தரக் கடனீட்டுப் பத்திரங்கள் (Unlisted Debt), REITs, InvITs, IPO-க்கள் மற்றும் ஆபத்து மேலாண்மைக்கான ஹெட்ஜிங் கருவிகள் சேர்க்கப்பட்டுள்ளன.
இந்திய சந்தைகளைத் தாண்டி சர்வதேச சந்தைகளில் முதலீடு செய்ய விரும்பும் உயர் நிகர மதிப்புடைய முதலீட்டாளர்களுக்கு இது மிகச் சிறந்த வாய்ப்பாக அமையும்.