இந்தியப் பொருளாதாரம் குறித்து IMF நற்செய்தி: 2026-27 நிதியாண்டு வளர்ச்சி கணிப்பு 7%-ஆக உயர்வு
செய்தி முன்னோட்டம்
சர்வதேச நாணய நிதியம்(IMF) தனது முக்கிய உலகப் பொருளாதார தொலைநோக்கு அறிக்கையில், இந்தியாவின் 2026-27 நிதியாண்டிற்கான மொத்த உள்நாட்டு உற்பத்தி(GDP) வளர்ச்சி கணிப்பை 7%-ஆக உயர்த்தியுள்ளது. முன்னதாக ஜூலை மாதத்தில் இந்த வளர்ச்சி 6.4%-ஆக இருக்குமென மதிப்பிடப்பட்டிருந்த நிலையில், தற்போது கணிசமாக அதிகரிக்கப்பட்டுள்ளது. உள்நாட்டு நுகர்வுத் தேவையின் மீள்தன்மை மற்றும் சேவைத் துறையின் வலுவான செயல்பாடுகளே இந்த வளர்ச்சி உயர்விற்கு முதன்மை காரணங்களாகும் என IMF சுட்டிக்காட்டியுள்ளது. சாதகமான மக்கள்தொகை நிலவரம், விரிவடைந்து வரும் உள்நாட்டுச் சந்தை மற்றும் அரசுத் துறையில் தொடர்ந்து மேற்கொள்ளப்பட்டு வரும் கட்டமைப்புச் சீர்திருத்தங்கள் ஆகியவை இந்தியப் பொருளாதாரத்திற்கு வலுவான ஆற்றலை வழங்கி வருகின்றன. வேகமாக வளர்ந்து வரும் முக்கியப் பொருளாதார நாடுகளில் இந்தியா முதன்மை இடத்தைத் தக்கவைத்துக்கொண்டுள்ளது.
கருத்துகள்
பொருளாதார வல்லுநர்களின் கருத்துகள்
வணிக பொருளாதார நிபுணர் சஞ்சிதா முகர்ஜி, ஐஎம்எஃப்-ன் இந்த மதிப்பீடு இந்தியாவின் உள்நாட்டு பொருளாதார வலிமையை வெளிப்படுத்துகிறது. இருப்பினும், சர்வதேச அளவில் நிலவும் கச்சா எண்ணெய் விலையேற்றம், புவிசார் அரசியல் பதற்றங்கள் மற்றும் இறக்குமதி பணவீக்கம் ஆகியவற்றைப் பங்குச்சந்தை முதலீட்டாளர்கள் கவனமாக அணுக வேண்டும் எனக் குறிப்பிட்டுள்ளார்.
பொருளாதார நிபுணர் மிதாலி நிகோர், இந்த 7% வளர்ச்சி கணிப்பு இந்தியப் பொருளாதாரத்தின் மீதான நம்பிக்கையை உறுதி செய்கிறது. ஆனால், முக்கிய கச்சா எண்ணெய் இறக்குமதி நாடாக இந்தியா இருப்பதால், கச்சா எண்ணெய் விலை உயர்வு குடும்பங்களின் வாங்கும் திறனைப் பாதிக்கக்கூடும். எனவே, இந்த வளர்ச்சியை முறையான வேலைவாய்ப்பு உருவாக்கமாகவும், தனியார் முதலீடாகவும் மாற்றுவதே உண்மையான சவாலாக இருக்கும் எனக் கூறியுள்ளார்.
ஏனைய நாடுகள்
உலகப் பொருளாதாரச் சூழல் மற்றும் ஏனைய நாடுகள்
மேற்கு ஆசியாவில் நீடித்து வரும் போர்ச் சூழல் மற்றும் விநியோகச் சங்கிலி பாதிப்புகள் உலகப் பொருளாதாரத்தைப் பாதித்து வருகின்றன.
வளர்ந்து வரும் சந்தைகளான சீனா, ரஷ்யா, பிரேசில் போன்ற நாடுகளின் வளர்ச்சி வேகம் குறைந்துள்ள நிலையில், ஜெர்மனி (1.3%) மற்றும் பிரிட்டன் (1.3%) ஆகிய வளர்ந்த நாடுகளின் கணிப்புகள் சிறிதளவு உயர்த்தப்பட்டுள்ளன.