ஆப்பிள் நிறுவனத்திற்கு வரி அச்சுறுத்தல் விடுத்ததை அடுத்து, சாம்சங்கை குறிவைக்கும் டிரம்ப்
செய்தி முன்னோட்டம்
அமெரிக்க அதிபர் டொனால்ட் டிரம்ப், நேற்று ஆப்பிள் நிறுவனத்திற்கு வரி கட்டண அச்சுறுத்தலை விடுத்திருந்தார்.
இந்தியா மட்டுமல்ல, வேறு எந்த நாட்டிலும் உற்பத்தி செய்யக்கூடாது என டிம் குக்கிற்கு அவர் கூறியிருந்தார்.
அடுத்த விசித்திரமான நடவடிக்கையாக இதே போன்றதொரு அச்சுறுத்தலை ஆப்பிளின் போட்டியாளரான சாம்சங்கிற்கும் டிரம்ப் இப்போது வெளியிட்டுள்ளார்.
அதன்படி, தென் கொரிய நிறுவனமான சாம்சங்கின் தொலைபேசிகள் அமெரிக்காவில் தயாரிக்கப்படாவிட்டால் 25% இறக்குமதி வரியை எதிர்கொள்ள நேரிடும் என்று அவர் எச்சரித்துள்ளார்.
வெள்ளை மாளிகையில் செய்தியாளர்களிடம் பேசிய டிரம்ப், அமெரிக்காவில் சாதனங்களை விற்பனை செய்யும் எந்தவொரு தொலைபேசி உற்பத்தியாளருக்கும் இந்த வரி பொருந்தும் என்றார்.
எச்சரிக்கை
"உள்நாட்டிலேயே தயாரிக்க வேண்டும், இல்லையென்றால் வரி"
"அது சாம்சங் மற்றும் அந்த தயாரிப்பை உருவாக்கும் எவரும் கூட. இல்லையெனில், அது நியாயமாக இருக்காது...அவர்கள் இங்கே தங்கள் ஆலையைக் கட்டும்போது, எந்த வரியும் இல்லை" என்று டிரம்ப் கூறினார்.
முன்னதாக ஆப்பிள் நிறுவனம் தனது ஐபோன்களை உள்நாட்டிலேயே தயாரிக்க வேண்டும் என்ற அழுத்தத்தை டிரம்ப் இதே பாணியில் தான் தெரிவித்தார்.
"அமெரிக்காவில் விற்கப்படும் ஐபோன்கள் இந்தியாவிலோ அல்லது வேறு எங்கும் அல்ல, அமெரிக்காவிலோ தயாரிக்கப்பட்டு கட்டமைக்கப்படும் என்று நான் எதிர்பார்க்கிறேன் என்று ஆப்பிள் தலைமை நிர்வாக அதிகாரி டிம் குக்கிடம் நான் நீண்ட காலத்திற்கு முன்பே தெரிவித்துள்ளேன். அப்படி இல்லையென்றால், ஆப்பிள் நிறுவனம் அமெரிக்காவிற்கு குறைந்தபட்சம் 25% வரியை செலுத்த வேண்டும்," என்று டிரம்ப் ட்ரூத் சோஷியலில் ஒரு பதிவில் கூறினார்.
தயாரிப்பு
ஆப்பிள் மற்றும் சாம்சங், சீனாவிற்கு மாற்றாக இந்தியாவை பார்க்கிறார்கள்
ஆய்வாளர்களின் கூற்றுப்படி, ஆப்பிளின் ஸ்மார்ட்போன்களில் சுமார் 90% சீனாவில் அசெம்பிள் செய்யப்படுகின்றன.
இருப்பினும், சீனாவுடனான அமெரிக்காவின் வர்த்தகப் போருக்கு மத்தியில், ஜூன் காலாண்டில் அமெரிக்காவில் விற்கப்படும் பெரும்பாலான ஐபோன்கள் "இந்தியாவைத் தாயகமாகக் கொண்டிருக்கும்" என்று குக் இந்த மாத தொடக்கத்தில் கூறினார்.
இருப்பினும், ஸ்மார்ட்போன் உற்பத்திக்கு சாம்சங் சீனாவை நம்பியிருக்கவில்லை.
அதன் பெரும்பாலான செயல்பாடுகள் இந்தியா, தென் கொரியா, வியட்நாம் மற்றும் பிரேசிலில் நடைபெறுகின்றன. தென் கொரிய தொழில்நுட்ப நிறுவனமான சாம்சங், 2019 ஆம் ஆண்டு சீனாவில் தனது கடைசி தொலைபேசி உற்பத்தி தொழிற்சாலையை மூடியது.