புதிய எலெக்ட்ரிக் மாடலை அறிமுகப்படுத்தியிருக்கிறது ஹோண்டா!
தயாரிப்புக்கு ஏற்றவகையில் இருக்கும் e:Ny1 எலெக்ட்ரிக் கார் மாடலை அறிமுகப்படுத்தியிருக்கிறது ஹோண்டா. இந்த மாடல் தான் ஹோண்டாவின் முதல் எலெக்ட்ரிக் எஸ்யூவியாகவும் வெளியாகவிருக்கிறது. சர்வதேச சந்தையில் எஸ்யூவி செக்மண்டில் இந்த ஆண்டு ஹோண்டா வெளியிடவிருக்கும் மூன்று முக்கியமான மாடல்களில் இதுவும் ஒன்று. இதனையே கடந்த ஆண்டு ப்ரோட்டோடைப் மாடலமாக அறிமுகப்படுத்தியிருந்தது ஹோண்டா. 2021-ல் வெளியான ஹோண்டா HR-V க்ராஸ்ஓவருக்கு இணையான மாடல் என்றும் இதனைக் கூறலாம். வெளியில் இருந்து பார்ப்பதற்கு HR-V-யின் டிசைனை ஒத்திருப்பது போல் இருந்தாலும், இதன் அடிப்படைக் கட்டுமானமும், உள்புறமும் முற்றிலும் புதிதாக வடிமைக்கப்பட்டிருக்கிறது. தங்களது புதிய எலெக்ட்ரிக் கார்களை ஹோண்டா நிறுவனம் சீனாவில் மட்டுமே வெளியிடும் என எதிர்பார்க்கப்பட்ட நிலையில் மற்ற சந்தைகளிலும் புதிய கார்களை அறிமுகப்படுத்தவிருக்கிறது ஹோண்டா.
எலெக்ட்ரிக் 'e:Ny1':
முன்பக்க ஆக்ஸிலில் 199hp பவர் மற்றும் 310Nm டார்க்கை உற்பத்தி செய்யக்கூடிய ஒரே ஒரு எலெக்ட்ரிக் மோட்டாரைப் பெற்றிருக்கிறது இந்த புதிய எலெக்ட்ரிக் எஸ்யூவி. 8.0 நொடிகளில் 0-100 கிமீ வேகத்தை எட்டிப்பிடிக்கும் இந்த எலெக்ட்ரிக் காரானது 412 கிமீ ரேஞ்சைக் கொண்டிருக்கும் எனத் தெரிவிக்கப்பட்டுள்ளது. போட்டியாளர்களின் கார்களும் கிட்டத்தட்ட இதே ரேஞ்சையே கொண்டிருப்பது குறிப்பிடத்தக்கது. இப்போதைக்கு ஃபாஸ்ட் சார்ஜருடன் 45 நிமிடங்களில் 10-80% சார்ஜ் ஆகிவிடும் எனத் தெரிவித்திருக்கிறது ஹோண்டா. தற்போது இந்தியாவில் எலெக்ட்ரிக் வாகனங்கள் எதையும் அறிமுகப்படுத்தும் திட்டம் ஹோண்டாவிற்கு இல்லை. ஐரோப்பா மற்றும் பிற வெளிநாட்டு சந்தைகளில் மட்டுமே இந்தக் காரை அந்நிறுவனம் அறிமுகப்படுத்தவிருக்கிறது. எனினும், அடுத்த மாதம் தங்களது புதிய எலிவேட் எஸ்யூவியை இந்தியாவில் அறிமுகப்படுத்தவிருக்கிறது ஹோண்டா.
