பாலஸ்தீனியத்திற்கு ஆதரவளிக்கும் அரபு நாடுகள் அகதிகளை ஏற்க மறுப்பது ஏன்?
செய்தி முன்னோட்டம்
இஸ்ரேலின் தாக்குதலால் பாதிப்படைந்துள்ள பாலஸ்தீனிய மக்களுக்கு ஆதரவளிக்கும் அரபு நாடுகள், பாலஸ்தீனிய மக்களை அகதிகளாக ஏற்க மறுத்து வருகின்றனர்.
காஸாவின் இரு எல்லைகளில் இருக்கும் நாடுகளான ஜோர்டான் மற்றும் எகிப்து, அகதிகளை ஏற்றுக்கொள்ள திட்டவட்டமாக மறுத்துள்ளன.
இது குறித்து பேசிய எகிப்து ஜனாதிபதி அப்துல் ஃபத்தா,
"இஸ்ரேல், காசாவை ஆளும் ஹமாஸ் அமைப்புக்கு எதிராக மட்டும் போரை நடத்தவில்லை, அங்கு வாழும் மக்களை அகதிகளாக எகிப்துக்கு வெளியேற்ற போர் செய்து வருகிறது" என குற்றம் சாட்டியிருந்தார்.
ஜோர்டானின் மன்னர் இரண்டாம் அப்துல்லா செவ்வாய்க்கிழமை அன்று, "ஜோர்டானில் அகதிகளுக்கு அனுமதி இல்லை, எகிப்திலும் அகதிகளுக்கு அனுமதி இல்லை" என்று கூறியிருந்தார்.
அதேபோல் பாலஸ்தீன மக்களுக்கு ஆதரவாக குரல்கொடுக்கும் எந்த நாடுகளும் அகதிகளை ஏற்றுக்கொள்ள தயாராகவில்லை.
2nd card
மக்கள் இடம் பெயர்ந்ததின் வரலாறு
பாலஸ்தீனத்தில் மக்கள் இடம்பெயர்வது தொடர்ந்து நடைபெற்று வருகிறது. கடந்த 1948 ஆம் ஆண்டு இஸ்ரேல் உருவானபோது, தற்போது இஸ்ரேலாக இருக்கும் பகுதியிலிருந்து கிட்டத்தட்ட 7 லட்சத்திற்கும் மேற்பட்ட பாலஸ்தீனியர்கள் இடம்பெயர்ந்தனர்.
கடந்த 1967ஆம் ஆண்டு நடந்த 'மத்திய கிழக்கு' போரின்போது, இஸ்ரேல் மேற்கு கரையையும், காஸாவையும் கைப்பற்றியது.
அங்கிருந்த சுமார் 3 லட்சத்திற்கு மேற்பட்ட மக்கள் அகதிகளாக வெளியேறினர். அதில் பெரும்பாலான மக்கள் ஜோர்டானில் குடியேறினர் என்பது குறிப்பிடத்தக்கது.
1948 ஆம் ஆண்டு போர் முடிவுக்கு வந்த பின், அகதிகளாக சென்ற பாலஸ்தீனர்கள் நாடு திரும்ப இஸ்ரேல் மறுத்துவிட்டது. அது அந்நாட்டின் பெரும்பான்மையான யூத மக்களை அச்சுறுத்தும் என இஸ்ரேல் வாதிட்டது.
தற்போது இந்த வரலாறு மீண்டும் திரும்பும் என எகிப்து அஞ்சுகிறது.
3rd card
மக்கள் திரும்பிச் செல்ல உத்தரவாதம் இல்லை
பத்து நாட்களுக்கு மேலாக போர் நடைபெற்று வரும் நிலையில், ஹமாஸ் இயக்கத்தை முற்றிலுமாக அழிக்கும் வரை ஓயமாட்டோம் என இஸ்ரேல் அறிவித்துள்ளது.
இது இந்த போர் எப்போது, எவ்வாறு முடிவடையும் என்ற தெளிவில்லாத சூழ்நிலையை உருவாக்கியுள்ளது.
மேலும் காஸாவை ஆண்டு வரும் ஹமாஸ் அமைப்பு ஒழிக்கப்பட்டால், காஸாவை யார் ஆள்வது என்ற கேள்வி எழுந்துள்ளது.
இது இஸ்ரேல் மீண்டும் காஸாவை ஆக்கிரமிக்க வழிவகுத்து, மேலும் மோதல்களை உண்டாக்கும் என அஞ்சப்படுகிறது.
வடக்கு காஸாவில் இருந்து இஸ்ரேல் பாதுகாப்பு படையின் உத்தரவை அடுத்து தெற்கு நோக்கி வெளியேறிய காஸா மக்கள், மீண்டும் அவர்களது பகுதிகளுக்கு அனுமதிக்கப்படுவர் என இஸ்ரேல் தெரிவித்துள்ளது.
இஸ்ரேலின் இந்த வாக்குறுதியை, எகிப்து ஜனாதிபதி நம்பவில்லை என்பது குறிப்பிடத்தக்கது.
4rd cad
எகிப்தில் நிரம்பி வழியும் அகதிகள்
இஸ்ரேலின் பாலஸ்தீனத்திற்கு எதிரான நடவடிக்கைகளை, எகிப்து தொடர்ந்து சந்தேகித்தும், எச்சரித்தும் வருகிறது.
இஸ்ரேல், இந்த போரின் மூலம், அந்தப் பிராந்தியத்தின் மிக முக்கியமான கோரிக்கையான தனி பாலஸ்தீன கோரிக்கையை அழிக்க பார்ப்பதாக குற்றம் சாட்டியுள்ளது.
மேலும் இது குறித்து பேசிய எகிப்து ஜனாதிபதி, ராணுவம் இல்லாத சுதந்திரமான பாலஸ்தீனியம், பேச்சு வார்த்தைகளின் மூலம் முன்னரே உருவாக்கப்பட்டிருந்தால் இந்த போருக்கு தேவை இருந்திருக்காது எனக்கூறியுள்ளார்.
ஏற்கனவே அகதிகளால் நிரம்பிவழியும் எகிப்து, இந்த போரால் மேலும் அகதிகள் வருவார்கள் என அஞ்சுகிறது.
கடும் பொருளாதார நெருக்கடியில் சிக்கி உள்ள எகிப்தில், தற்போது 9 லட்சம் அகதிகள் உள்ளனர். இதில் 3 லட்சம் பேர் இந்த ஆண்டு சூடானிலிருந்து அகதிகளாக வந்தவர்கள் என்பது குறிப்பிடத்தக்கது.
5th card
அகதிகளுடன் ஆயுத குழுவினரும் வரலாம் என அஞ்சும் எகிப்து
காசாவில் இருந்து மக்கள் அகதிகளாக வெளியேறும் போது, அவர்களுடன் ஹமாஸ் அல்லது வேறு தீவிரவாத அமைப்புகள் வெளியேறி தங்கள் நாட்டுக்குள் ஊடுருவலாம் என எகிப்து அஞ்சுகிறது.
கடந்த 2007 ஆம் ஆண்டு காசாவை ஹமாஸ் கையகப்படுத்தியது முதல், அதன் எல்லைகளை தீவிரமாக கண்காணித்து வருகிறது எகிப்து.
மேலும் எகிப்து- காஸா பகுதியை இணைக்கும் பல சுரங்கங்களையும் அது துண்டித்தது.
இந்நிலையில், காஸா மக்களை எகிப்துக்குள் அனுமதித்ததால், ஹமாஸ் அல்லது வேறு ஆயுத குழுக்கள், எகிப்தில் இருந்தபடி இஸ்ரேல் மீது தாக்குதல் நடத்தலாம் என கருதுகிறது எகிப்து.
இது எகிப்து- இஸ்ரேலிடையே 40 ஆண்டுகளுக்கு மேலாக நீடித்துவரும் அமைதி ஒப்பந்தத்தை சிதைத்து விடும் என எகிப்து கூறுகிறது.