105 மதிப்புமிக்க தொல்பொருட்களை இந்தியாவிடம் திருப்பி கொடுத்தது அமெரிக்கா
பிரதமர் மோடியின் அரசுமுறை அமெரிக்க பயணம் முடிந்து சில நாட்களே ஆகி இருக்கும் நிலையில், இந்தியாவுக்கு சொந்தமான 105 மதிப்புமிக்க தொல்பொருட்களை அமெரிக்கா இந்தியாவிடம் ஒப்படைத்தது. நியூயார்க்கில் உள்ள இந்திய துணைத் தூதரகத்தில் சிறப்புத் திருப்பலி விழா ஒன்று நடைபெற்றது. இந்த விழாவின் போது, அமெரிக்காவுக்கான இந்தியத் தூதுவர் தரன்ஜித் சிங் சந்து, கன்சல் ஜெனரல் ரந்தீர் ஜெய்ஸ்வால் மற்றும் மன்ஹாட்டன் மாவட்ட வழக்கறிஞர் அலுவலக அதிகாரிகள் ஆகியோர் முன்னிலையில் மதிப்புமிக்க இந்தியப் பழங்காலப் பொருட்கள் சிலவற்றை அமெரிக்கா இந்தியாவிடம் ஒப்படைத்தது. இந்த விழாவில் உரையாற்றிய தரன்ஜித், இந்தியாவுக்கு சொந்தமான 100 தொல்பொருட்கள் "வெறும் கலைபொருட்கள் மட்டுமல்ல. இவை நமது பாரம்பரியம், கலாச்சாரம் மற்றும் மதத்தின் ஒரு பகுதியாகும்" என்று கூறினார்.
கலாச்சார முக்கியத்துவம் வாய்ந்த தொல்பொருட்கள் இந்தியாவுக்கு அனுப்பப்பட்டது
"இந்த இழந்த பாரம்பரிய பொருட்கள் வீடு திரும்பும்போது, அது மிகுந்த உணர்ச்சிவசத்துடன் பெறப்படும். இவை விரைவில் இந்தியாவுக்கு கொண்டு செல்லப்படும்." என்றும் அவர் கூறினார். "இந்த 105 தொல் பொருட்களில் 47 பொருட்கள் கிழக்கு இந்தியாவை சேர்ந்தவைகளாவும், 27 பொருட்கள் தென் இந்தியாவை சேர்ந்தவைகளாவும், 22 பொருட்கள் மத்திய இந்தியாவை சேர்ந்தவைகளாவும், 6 பொருட்கள் வட இந்தியாவை சேர்ந்தவைகளாவும், 3 பொருட்கள் மேற்கு இந்தியாவை சேர்ந்தவைகளாவும் இருக்கின்றன" என்று ஒரு அதிகாரபூர்வ அறிக்கையில் தெரிவிக்கப்பட்டுள்ளது. "கி.பி. 2-3 ஆம் நூற்றாண்டு முதல் கிபி 18-19 ஆம் நூற்றாண்டு வரையிலான காலக்கட்டத்திற்கு சொந்தமான இந்த கலைப்பொருட்கள் டெரகோட்டா, கல், உலோகம் மற்றும் மரத்தால் செய்யப்பட்டவைகளாகும்." என்றும் அந்த அறிக்கையில் கூறப்பட்டுள்ளது.
