அமெரிக்க அரசு ஊழியர்களுக்கு 8 மாத ஊதியத்துடன் விஆர்எஸ் திட்டத்தை அறிவித்தார் டொனால்ட் டிரம்ப்
செய்தி முன்னோட்டம்
அமெரிக்க அரசாங்கத்தில் உள்ள ஊழியர்களின் அளவைக் கணிசமாகக் குறைக்கும் நோக்கில், அலுவலகப் பணிக்குத் திரும்ப விரும்பாத ஃபெடரல் அரசு ஊழியர்களுக்கான விருப்ப ஓய்வு திட்டத்தை அதிபர் டொனால்ட் டிரம்ப் அறிவித்துள்ளார்.
செவ்வாயன்று (ஜனவரி 28) மில்லியன் கணக்கான ஃபெடரல் ஊழியர்களுக்கு அனுப்பப்பட்ட மின்னஞ்சலில், ஊழியர்களுக்கு விஆர்எஸ் ராஜினாமா திட்டத்தை ஏற்க பிப்ரவரி 6 வரை அவகாசம் அளிக்கப்பட்டது.
இதுதொடர்பாக சிபிஎஸ் வெளியிட்டுள்ள அறிக்கையின்படி, சுமார் 10% ஃபெடரல் பணியாளர்கள் அதாவது சுமார் 200,000 ஊழியர்கள் இந்த விஆர்எஸ் திட்டத்தைத் தேர்வு செய்யலாம் என்று டிரம்ப் நிர்வாகம் எதிர்பார்க்கிறது.
இது அரசாங்கத்திற்கு $100 பில்லியன் வரை சேமிப்பைக் கொடுக்கும். அதேநேரத்தில் விஆர்எஸ் திட்டத்தை தேர்வு செய்பவர்களுக்கு 8 மாத ஊதியம் வழங்கப்படும்.
விதிவிலக்குகள்
குறிப்பிட்ட துறைகளுக்கு விதிவிலக்குகள்
அஞ்சல் ஊழியர்கள், ராணுவ வீரர்கள், குடிவரவு அதிகாரிகள் மற்றும் தேசிய பாதுகாப்பு ஊழியர்கள் உள்ளிட்ட குறிப்பிட்ட துறைகளுக்கு இந்த திட்டத்தில் இருந்து விதிவிலக்குகளும் வழங்கப்பட்டுள்ளன.
இருப்பினும், பணியாளர் மேலாண்மை அலுவலகத்தின் மின்னஞ்சலில் விஆர்எஸ் திட்டத்தை தேர்வு செய்யாதவர்களுக்கு எதிர்காலத்தில் பணிநீக்கம் செய்யப்படும் வாய்ப்பும் உள்ளதாக எச்சரித்துள்ளது.
கொரோனா தொற்றுநோய்க்குப் பிறகு வீட்டிலிருந்தே பணிபுரிந்த ஃபெடரல் ஊழியர்கள் முழுநேர அலுவலகங்களுக்குத் திரும்ப வேண்டும் என்ற டிரம்பின் கட்டளையைத் தொடர்ந்து இந்த அறிவிப்பு வந்துள்ளது குறிப்பிடத்தக்கது.
வெள்ளை மாளிகையின் துணைத் தலைவர் ஸ்டீபன் மில்லர் இந்த நடவடிக்கையை நியாயப்படுத்தினார், டிரம்ப் அரசாங்கத்தின் கட்டுப்பாட்டைப் பெறுவது அவசியம் என்று கூறினார்.