மும்பை தீவிரவாத தாக்குதலுக்கு உதவிய LeT தலைவர், பாகிஸ்தான் சிறையில் உயிரிழந்தார்
செய்தி முன்னோட்டம்
2008 மும்பை தாக்குதலில் ஈடுபட்ட பயங்கரவாதிகளுக்கு உதவிய லஷ்கர்-இ-தொய்பா(LeT) தலைவர் அப்துல் சலாம் புட்டவி, பாகிஸ்தான் சிறையில் மரணமடைந்தார். பயங்கரவாதிகளுக்கு நிதியுதவி செய்த குற்றத்திற்காக அவர் பாகிஸ்தான் சிறையில் அடைக்கப்பட்டிருந்த போது, இந்த சம்பவம் நிகழ்ந்தது. 2012ஆம் ஆண்டு ஐக்கிய நாடுகளின் பாதுகாப்பு கவுன்சிலால் புட்டவி பயங்கரவாதியாக அறிவிக்கப்பட்டார். பல ஆண்டுகளுக்குப் பிறகு பயங்கரவாதத்திற்கு நிதியுதவி செய்ததாக குற்றம் சாட்டப்பட்டு, அவர் பாகிஸ்தானால் கைது செய்யப்பட்டார். லஷ்கர்-இ-தொய்பா நிறுவனர் ஹபீஸ் சயீத்தின் மைத்துனர் அப்துல் ரஹ்மான் மக்கியுடன் சேர்த்து புட்டவிக்கும் பயங்கரவாத நிதியுதவி வழக்கில் தண்டனை வழங்கப்பட்டது. ஆகஸ்ட் 2020இல் புட்டவிக்கு 16.6 ஆண்டுகள் சிறைத்தண்டனை விதிக்கப்பட்டது.
details
மாரடைப்பால் மரணமடைந்த பயங்கரவாத தலைவர்
2002 மற்றும் 2008ஆம் ஆண்டுகளில் ஹபீஸ் சயீத் பாகிஸ்தான் அதிகாரிகளால் கைது செய்யப்பட்டபோது, லஷ்கர் இடியின் செயல் தலைவராக புட்டவி பணியாற்றி இருக்கிறார். இந்நிலையில், பயங்கரவாதக் குழுவுடன் தொடர்புடைய பல அமைப்புகள் நேற்று இரவு புட்டவியின் மரணத்தை அறிவித்தன. பாகிஸ்தானின் பஞ்சாப் மாகாணத்தில் இருக்கும் ஷேகுபுராவில் உள்ள சிறையில் நேற்று பிற்பகல் புட்டவி மாரடைப்பால் மரணமடைந்ததாக அந்த அறிவிப்புகள் தெரிவிக்கின்றன. லாகூர் முரிட்கேயில் உள்ள பயங்கரவாதக் குழுவின் மையத்தில் வைத்து இன்று காலை அவருக்கான இறுதி சடங்குகள் நடத்தப்பட்டன. இந்த இறுதிச் சடங்குகளைக் காட்டும் வீடியோவையும் லஷ்கர்-இ-தொய்பாவின் முன்னணி அமைப்புகள் வெளியிட்டுள்ளன. அவரது மரணத்தை இந்திய உளவுத்துறை அதிகாரிகளும் உறுதிப்படுத்தி உள்ளனர். ஆனால் விரிவான விவரங்கள் உடனடியாக கிடைக்கவில்லை என்று அவர்கள் கூறியுள்ளனர்.