'தாக்குதல் நடந்தால் ஒன்றிணைந்து பதிலடி'; கத்தார், துருக்கி முக்கிய பாதுகாப்பு ஒப்பந்தம்
செய்தி முன்னோட்டம்
வளைகுடா பிராந்தியத்தில் அதிகரித்து வரும் பாதுகாப்பு அச்சுறுத்தல்களைத் தொடர்ந்து, கத்தார் மற்றும் துருக்கி ஆகிய நாடுகள் தங்களது ராணுவ உறவை அடுத்த கட்டத்திற்கு எடுத்துச் சென்றுள்ளன. துருக்கியின் இஸ்தான்புல் நகரில் வெள்ளிக்கிழமை நடைபெற்ற உயர்மட்ட உத்திசார் குழுவின் 12-வது கூட்டத்தில், அதிபர் எர்டோகன் மற்றும் கத்தார் அமீர் ஷேக் தமீம் ஆகியோர் சந்தித்துப் பேசினர். இந்த சந்திப்பின் போது இரு நாடுகளுக்கு இடையே பரஸ்பர பாதுகாப்பு ஒப்பந்தம் அதிகாரப்பூர்வமாக கையெழுத்தானது.
முக்கிய விதிகள்
வெளிப்புற ஆயுத தாக்குதல்களை ஒன்றிணைந்து எதிர்கொள்ளும் முக்கிய விதிகள்
புதிதாக கையெழுத்தாகியுள்ள இந்தப் பரஸ்பர பாதுகாப்பு ஒப்பந்தத்தின்படி, துருக்கி அல்லது கத்தார் ஆகிய இரு நாடுகளில் ஏதேனும் ஒன்றின் மீதோ அல்லது இரண்டின் மீதோ வெளிப்புற ஆயுதத் தாக்குதல் நடத்தப்பட்டால் இரு நாடுகளும் ஒன்றிணைந்து எதிர்கொள்ளும்.
மேலும் கூட்டு ராணுவ பயிற்சிகள், பாதுகாப்புத் தொழில்நுட்பப் பரிமாற்றம், வீரர்களுக்கான பயிற்சி மற்றும் பிராந்தியப் பாதுகாப்பு அச்சுறுத்தல்கள் குறித்துத் தொடர்ந்து ஆலோசனை நடத்தவும் இரு நாடுகளும் ஒப்புக்கொண்டுள்ளன.
இது இரு நாடுகளின் இறையாண்மையை பாதுகாப்பதில் முக்கிய பங்கு வகிக்கும்.
பத்ர் ஒப்பந்தம்
பத்ர் ஒப்பந்தம் மற்றும் வர்த்தக, அமைதி பேச்சுவார்த்தை முன்னேற்றங்கள்
கடந்த அக்டோபர் மாதம் துருக்கி, கத்தார், பாகிஸ்தான் மற்றும் இந்தோனேசியா ஆகிய நான்கு நாடுகள் இணைந்து கையெழுத்திட்ட பத்ர் பாதுகாப்புத் தொழில்நுட்ப ஒப்பந்தத்தை இரு தலைவர்களும் வரவேற்றனர்.
இதன் மூலம் உள்நாட்டுப் பாதுகாப்புத் தளவாட உற்பத்தி மற்றும் விநியோக சங்கிலியை வலுப்படுத்த முடியும் எனத் தெரிவிக்கப்பட்டுள்ளது.
மேலும் வளைகுடா பிராந்தியத்தில் போர் மூளாமல் தடுக்கவும், காசா விவகாரத்தில் அமைதியை நிலைநாட்டவும் ராஜதந்திர ரீதியான முயற்சிகளைத் தொடர அதிபர் எர்டோகன் வலியுறுத்தியுள்ளார்.
பிராந்திய கூட்டணி
சவுதி - பாகிஸ்தான் ஒப்பந்தத்தைத் தொடர்ந்து வலுப்பெறும் பிராந்திய கூட்டணி
மத்திய கிழக்கு பிராந்தியத்தில் பாதுகாப்புக் கூட்டணிகள் வேகமாக உருவாகி வருகின்றன.
ஏற்கனவே கடந்த ஆகஸ்ட் மற்றும் செப்டம்பர் மாதங்களில் சவுதி அரேபியா, பாகிஸ்தான் மற்றும் துருக்கி ஆகிய நாடுகள் நேட்டோ பாணியிலான கூட்டுப் பாதுகாப்பு ஒப்பந்தத்தில் கையெழுத்திட்டிருந்தன.
அதன் தொடர்ச்சியாக தற்போது கத்தாரும் துருக்கியும் நேரடிப் பரஸ்பர பாதுகாப்பு ஒப்பந்தத்தில் இணைந்துள்ளதால், வளைகுடா பிராந்தியத்தின் புவிசார் அரசியலில் புதிய சமநிலை ஏற்பட்டுள்ளது.