ஒரே பாலின முத்தம்: பெரும் இசை விழாவை நிறுத்தியது மலேசியா
செய்தி முன்னோட்டம்
மலேசியாவின் LGBTQ-எதிர்ப்பு சட்டங்களை கண்டித்து, 'தி 1975' என்ற இசைக்குழுவை சேர்ந்த பாடகர் தனது ஆண் நண்பருக்கு முத்தம் கொடுத்ததை அடுத்து, மலேசிய அதிகாரிகள் சனிக்கிழமையன்று ஒரு மாபெரும் இசை விழாவை ரத்து செய்தனர்.
அந்த பாடகர் மேடையில் வைத்து மலேசியாவின் LGBTQ-எதிர்ப்பு சட்டங்களை விமர்சித்ததாகவும், தனது இசைக்குழுவை சேர்ந்த இன்னொரு ஆணுக்கு முத்தம் கொடுத்ததாகவும் கூறப்படுகிறது.
'தி 1975' இசைக்குழுவின் பாடகரான மேட்டி ஹீலி, "யார் யாருடன் உறவு வைத்துக்கொள்ளலாம் என்பதை தீர்மானிக்கும் ஒரு நாட்டிற்கு, 'தி 1975' இசைக்குழுவை ஏன் அழைக்கிறார்கள் என்பது எனக்கு புரியவில்லை" என்று மேடையில் பேசியுள்ளார்.
ஜே
மலேசியாவில் LGBTQ சமூகத்தினருக்கு எதிரான கருத்துக்கள் அதிகரித்து வருகிறது
இதனையடுத்து, "மலேசிய சட்டங்களை சவால் செய்யும், இழிவுபடுத்தும் மற்றும் மீறும் எந்தவொரு தரப்பினருக்கும் ஆதரவாக சமரசம் செய்ய முடியாது" என்று அந்நாட்டின் தகவல் தொடர்பு அமைச்சர் ஃபஹ்மி ஃபட்சில் தனது ட்விட்டர் பதிவில் தெரிவித்துள்ளார்.
ஞாயிற்றுக்கிழமை வரை நடைபெற இருந்த இந்த மூன்று நாட்கள் விழாவான 'குட் வைப்ஸ் விழா'வின் அமைப்பாளர்களையும் தகவல் தொடர்பு அமைச்சர் ஃபஹ்மி ஃபட்சில் சந்தித்து பேசியதாக செய்திகள் கூறுகின்றன.
மேலும், 'தி 1975' இசைக்குழு இனி மலேசியாவில் நிகழ்ச்சி நடத்த தடை விதிக்கப்பட்டுள்ளதாகவும் தெரிவிக்கப்பட்டுள்ளது.
முஸ்லிம்கள் பெரும்பான்மையாக வாழும் மலேசியாவில் தன்பாலின ஈர்ப்பு என்பது ஒரு குற்றமாகும்.
மேலும், சமீபகாலமாக மலேசியாவில் LGBTQ சமூகத்தினருக்கு எதிரான கருத்துக்கள் அதிகரித்துள்ளதாக சமூக ஆர்வலர்கள் எச்சரித்து வருகின்றனர்.