பெலிஸில் விமானத்தைக் கடத்த முயன்றவரை நடுவானில் சுட்டுக்கொன்ற பயணி
செய்தி முன்னோட்டம்
வியாழக்கிழமை மத்திய அமெரிக்காவின் பெலிஸில் ஒரு சிறிய டிராபிக் ஏர் விமானத்தை கத்தி முனையில் கடத்திச் சென்ற ஒரு நபர், பின்னர் ஒரு பயணியால் சுட்டுக் கொல்லப்பட்டதாக ராய்ட்டர்ஸ் செய்தி வெளியிட்டுள்ளது.
அமெரிக்க குடிமகன் என கண்டறியப்பட்ட அந்த கடத்தல்காரன் அகின்யேலா சாவா டெய்லர் என அடையாளம் காணப்பட்டுள்ளார்.
அவர், விமானம் காற்றில் பறந்து கொண்டிருந்தபோது கத்தியை எடுத்து, விமானம் மூலம் தன்னை நாட்டிலிருந்து வெளியேற்றக் கோரினார்.
சிறிய ரக டிராபிக் ஏர் விமானம், 14 பயணிகள் மற்றும் இரண்டு பணியாளர்களை ஏற்றிச் சென்றது.
பெலிஸின் மெக்சிகோ எல்லைக்கு அருகிலுள்ள கொரோசல் என்ற சிறிய நகரத்திலிருந்து, பிரபலமான சுற்றுலா தலமான சான் பெட்ரோவுக்குச் சென்று கொண்டிருந்தபோது, அது கடத்தப்பட்டதாக அசோசியேட்டட் பிரஸ் தெரிவித்துள்ளது.
விவரங்கள்
கடத்தல் பற்றி காவல்துறை கூறுவது என்ன?
போலீஸ் கமிஷனர் செஸ்டர் வில்லியம்ஸின் கூற்றுப்படி, டெய்லர், விமானத்தில் இருந்த மூன்று பேரை கத்தியால் குத்தினார்.
தாக்குதலில் காயமடைந்தவர்களில் விமானி மற்றும் டெய்லரை துப்பாக்கியால் சுட்ட பயணி ஆகியோர் அடங்குவர்.
கடத்தல் நாடகம் நடந்தபோது, விமானம் கிட்டத்தட்ட இரண்டு மணி நேரம் சீரற்ற முறையில் வட்டமிட்ட பிறகு பாதுகாப்பாக தரையிறங்கியது.
காயமடைந்த இரண்டு பயணிகளும், விமானியும் மருத்துவமனையில் சிகிச்சை பெற்று வருவதாக அதிகாரிகள் தெரிவித்தனர்.
டெய்லரை நோக்கி சுட்ட பயணியின் முதுகில் கத்தியால் குத்தப்பட்டு, நுரையீரலில் ஒரு துளை ஏற்பட்டதாகவும், அவர் இன்னும் ஆபத்தான நிலையில் இருப்பதாகவும் வில்லியம்ஸ் கூறினார்.
விமான நிலைய தகவலின்படி, டெய்லர் அமெரிக்காவில் ஆசிரியராக இருந்தார். மிசோரியின் புளோரிசாண்டில் உள்ள உயர்நிலைப் பள்ளியில் கால்பந்து பயிற்சியாளராக இருந்ததாக கூறப்படுகிறது.