டிரம்பிற்குப் பதிலடி கொடுக்க பாலையா நடித்த தெலுங்குப் பட காட்சியை பயன்படுத்திய ஈரான்; எக்ஸ் தளத்தில் வைரல்
செய்தி முன்னோட்டம்
ஐநா பொதுச்சபை கூட்டத்தில் உரையாற்றிய அமெரிக்க அதிபர் டொனால்ட் டிரம்ப், ஈரானை முற்றிலும் அழிக்கப்போவதாகவும் அல்லது மீள முடியாத அளவிற்கு அவர்களை நரகத்திற்குள் தள்ளப்போவதாகவும் பகிரங்க எச்சரிக்கை விடுத்திருந்தார். டிரம்பின் இந்த ஆவேசப் பேச்சுக்கு உடனடியாக பதிலடி கொடுக்கும் விதமாக, ஜிம்பாப்வே நாட்டில் உள்ள ஈரான் தூதரகம் தனது அதிகாரப்பூர்வ எக்ஸ் சமூக வலைதளப் பக்கத்தில் இந்திய திரைப்படக் காட்சி ஒன்றைப் பகிர்ந்து டிரம்பை கடுமையாகக் கிண்டல் செய்துள்ளது. கூடுதல் விபரங்கள் இங்கே:-
எக்ஸ் பதிவு
டிரம்ப் பாலிவுட் படங்களைப் பார்க்கிறார் என ட்வீட் செய்த ஈரான் தூதரகம்
ஈரான் தூதரகம் தனது பதிவில், "ஈரானை அழிக்கப்போவதாக டொனால்ட் டிரம்ப் கூறுகிறார்.
ஆனால் ஈரான் ஒன்றும் பாதுகாப்பற்ற நாடு அல்ல என்பது அவருக்கு நன்றாகவே தெரியும்" என்று குறிப்பிட்டிருந்தது.
மேலும் "சமீபகாலமாக டிரம்ப் ஹாலிவுட் படங்களைப் பார்ப்பதை விட்டுவிட்டு, அதிகளவில் இந்திய பாலிவுட் படங்களைப் பார்க்கத் தொடங்கியுள்ளார் போலிருக்கிறது" எனக் கிண்டல் செய்து, நடிகர் பாலையா மேன்ஹோல் மூடியைக் கொண்டு துப்பாக்கியால் சுடும் எதிரிகளை அதிரடியாகத் தாக்கும் மாஸ் வீடியோ காட்சி ஒன்றைப் பதிவிட்டிருந்தது.
ட்விட்டர் அஞ்சல்
Twitter Post
Trump talks about annihilating Iran.
— Iran Embassy in Zimbabwe (@IRANinZIMBABWE) September 23, 2026
But he knows Iran is not defenseless.
Since we informed they have recently been watching Bollywood instead of Hollywood. pic.twitter.com/v6Le8zkH5X
பாலிவுட் அல்ல
தெலுங்குப் படமான பகவந்த் கேசரி என கலாய்த்த நெட்டிசன்கள்
ஈரான் தூதரகம் பகிர்ந்த அந்த மாஸ் வீடியோ காட்சி உண்மையில் பாலிவுட் படம் அல்ல. அது தெலுங்குத் திரையுலகின் முன்னணி மூத்த நடிகர் நந்தமுரி பாலகிருஷ்ணா நடிப்பில், அனில் ரவிபூடி இயக்கத்தில் வெளியான பகவந்த் கேசரி திரைப்படக் காட்சியாகும்.
இதை பார்த்த சமூக வலைதள பயனர்கள், "இது பாலிவுட் அல்ல, டோலிவுட்! ஈரான் மற்றும் அமெரிக்காவிற்கு இடையிலான உறவு எப்படி உள்ளதோ, அதேபோன்று தான் இந்தத் தெலுங்குப் படத்திற்கும் இயற்பியல் விதிகளுக்கும் இடையிலான உறவு உள்ளது" என மீம்ஸ்களைப் பறக்கவிட்டு வருகின்றனர்.
தேசிய விருது
தேசிய விருது பெற்ற பகவந்த் கேசரி திரைப்படத்தின் பின்னணி
ஈரான் தூதரகத்தால் பகிரப்பட்ட பகவந்த் கேசரி திரைப்படம், கடந்த 2023 ஆம் ஆண்டு தசராவிற்கு வெளியாகி மாபெரும் வசூல் சாதனை படைத்த திரைப்படமாகும்.
பெண் உரிமைகளை வலியுறுத்தும் உணர்ச்சிப்பூர்வமான ஆக்ஷன் கதையம்சம் கொண்ட இந்த திரைப்படம், 71-வது தேசிய திரைப்பட விருதுகளில் சிறந்த தெலுங்குத் திரைப்படம் என்ற விருதையும் வென்றிருந்தது குறிப்பிடத்தக்கது.
பாலிவுட் என நினைத்துத் தெலுங்குப் படத்தைப் பகிர்ந்து டிரம்ப்பை வம்புக்கு இழுத்த ஈரானின் இந்த செயல் தற்போது இணையத்தில் வைரலாகி வருகிறது.