இந்தியா-அமெரிக்கா போர் விமான இன்ஜின் ஒப்பந்தம்: அமெரிக்க பாராளுமன்றம் ஒப்புதல்
செய்தி முன்னோட்டம்
கடந்த ஜூன் மாதம் பிரதமர் மோடி அமெரிக்காவுக்கு சுற்றுப் பயணம் மேற்கொண்டிருந்த போது, இந்தியா போர் விமானங்களில் பயன்படுத்தும் வகையிலான GE-414 ரக இன்ஜின் தொழில்நுட்பத்தை வழங்குவதற்கான புரிந்துணர்வு ஒப்பந்தம் கையெழுத்தானது.
இந்தப் புரிந்துணர்வு ஒப்பந்தமானது அமெரிக்காவின் GE ஏரோஸ்பேஸ் நிறுவனம் மற்றும் இந்தியாவின் ஹிந்துஸ்தான் ஏரோநாட்டிக்ஸ் லிமிடட் ஆகிய நிறுவனங்களுக்கிடையே கையெழுத்தானது.
இந்தப் புரிந்துணர்வு ஒப்பந்தத்தின் கீழ், F414 போர்விமானங்களுக்கான ஜெட் இன்ஜினின் தொழில்நுட்பத்தில் 80%-த்தை இந்தியாவுடன் பகிர்ந்து கொள்வது, இந்தியாவில் அந்த இன்ஜின்களைத் தயாரிப்பது மற்றும் அதன் உரிமத்தை வழங்குவது ஆகியவை தொடர்பாக நடவடிக்கைகள் எடுக்கப்படவிருக்கின்றன.
இந்த ஜெட் இன்ஜினை இந்தியாவின் LCA (Light Combat Aircraft) MkII போர் விமானத்தில் பயன்படுத்தத் திட்டமிட்டு வருகிறது இந்தியா.
இந்தியா
ஒப்புதல் அளித்த அமெரிக்க பாராளுமன்றம்:
இந்தியா மற்றும் அமெரிக்கா இடையிலான, மேற்கூறிய இன்ஜின் குறித்த ஒப்பந்தத்தின் அடுத்த கட்டமாக, கடந்த ஜூலை 28ம் தேதி அமெரிக்க பாராளுமன்றத்தின் இரு அவைகளிலும், இந்த ஒப்பந்தம் மேற்கொள்ளவிருப்பது குறித்து அறிவிக்கப்பட்டது.
அறிவிக்கப்பட்டத்தில் இருந்து 30 நாட்களுக்கு இரு அவைகளில் இருந்து எந்தப் பிரதிநிதியும் ஆட்சேபனை தெரிவிக்காத பட்சத்தில், அது குறிப்பிட்ட திட்டத்திற்கு ஒப்புதல் அளிக்கப்பட்டதாக எடுத்துக் கொள்ளப்படும்.
தற்போதும் இந்தியாவுடனான இன்ஜின் ஒப்பந்தத்திற்கு இரு அவைகளிலும் யாரும் எதிர்ப்பு தெரிவிக்காத நிலையில், பாராளுமன்றத்தில் ஒப்புதல் அளிக்கப்பட்டிருப்பதாகத் தெரிவிக்கப்பட்டுள்ளது.
இதனைத் தொடர்ந்து, G20 மாநாட்டில் பங்கேற்க, வரும் செப்டம்பரில் அமெரிக்க அதிபர் ஜோ பிடன் இந்தியாவிற்கு வருகை தரும் போது, இந்த ஒப்பந்தத்தை முன்னெடுத்துச் செல்வதற்கான விவாதங்கள் நடைபெறும் என எதிர்பார்க்கப்படுகிறது.