அடுத்தடுத்து 140 ராக்கெட்டுகளை ஏவி தாக்குதல்; இஸ்ரேலுக்கு பதிலடி கொடுத்தது ஹிஸ்புல்லா
செய்தி முன்னோட்டம்
ஏறக்குறைய ஒரு வருட போரில் தெற்கு லெபனானில் இஸ்ரேல் மிகத் தீவிரமான தாக்குதல்களை கட்டவிழ்த்துவிட்ட ஒரு நாளுக்குப் பிறகு, வெள்ளிக்கிழமை (செப்டம்பர் 20) லெபனான்-இஸ்ரேல் எல்லையில் இஸ்ரேலும் ஹிஸ்புல்லாவும் மீண்டும் மாறிமாறி தாக்குதல் நடத்தியுள்ளனர்.
ஐநா சபை இருதரப்பும் அமைதியை கடைபிடிக்க வலியுறுத்திய நிலையில் இந்த தாக்குதல் நடைபெற்றுள்ளது.
முன்னதாக, பேஜர் மற்றும் வாக்கி டாக்கி போன்ற அடுத்தடுத்த குண்டுவெடிப்பு தாக்குதலுக்குப் பிறகு, இஸ்ரேலுக்கு உரிய பதிலடி கொடுக்கப்படும் என ஹிஸ்புல்லா தலைவர் ஹசன் நஸ்ரல்லா சபதம் செய்த ஒரு நாளுக்குப் பிறகு, வெள்ளிக்கிழமை வடக்கு இஸ்ரேலை ஹிஸ்புல்லா 140 ராக்கெட்டுகளால் தாக்கியது.
இதற்கிடையே, லெபனானுடனான எல்லையில் உள்ள தளங்களை குறிவைத்து மூன்று அலைகளில் ராக்கெட்டுகள் வந்ததாக இஸ்ரேல் இராணுவம் கூறியுள்ளது.
தாக்குதல்
இஸ்ரேல் தாக்குதல்
இஸ்ரேலை நோக்கி ஏவப்பட்ட நூற்றுக்கணக்கான ஹிஸ்புல்லா ராக்கெட் லாஞ்சர்களை தாக்கியதாக இஸ்ரேல் இராணுவம் வியாழனன்று கூறியது.
கடந்த அக்டோபரில் போர் தொடங்கியதில் இருந்து இதுபோன்ற மிகப்பெரிய தாக்குதல் இது என்று லெபனானில் பாதுகாப்பு வட்டாரங்கள் தெரிவித்தன.
ஹிஸ்புல்லாவின் தாக்குதல்களுக்கு இடையில், வெள்ளிக்கிழமை இஸ்ரேலிய விமானங்கள் தெற்கு லெபனானில் குறைந்தது மூன்று கிராமங்களைத் தாக்கியதாக லெபனானின் பாதுகாப்பு ஆதாரங்கள் மற்றும் ஹிஸ்புல்லாவின் அல்-மனார் தொலைக்காட்சி தெரிவித்தது.
இந்த தாக்குதல்கள் காரணமாக மத்திய கிழக்கு பகுதியில் மிகப்பெரிய அளவில் போர்ப்பதற்றம் உருவாகியுள்ளது. விரைவில் இது முழுநீள போராக வெடிக்கும் என பாதுகாப்பு நிபுணர்கள் கூறியுள்ளனர்.