இந்தியாவைச் சுற்றி உட்கட்டமைப்புகளை மேம்படுத்தும் சீனா மற்றும் பாகிஸ்தான்
செய்தி முன்னோட்டம்
இந்தியாவைச் சுற்றி எல்லைப் பகுதியில் இருக்கும் பல்வேறு உட்கட்டமைப்புகளையும் மேம்படுத்தி வருகிறது சீனா. அந்த வகையில் சீனாவும் பாகிஸ்தானும் இணைந்து கரகோரம் நெடுஞ்சாலையை மேம்படுத்தத் திட்டமிட்டு வருகின்றன.
இந்த நெடுஞ்சாலையானது பாகிஸ்தானில் இருந்து சீனா வரை 1,300 கிமீ தூரத்திற்கு நீள்கிறது. இந்த நெடுஞ்சாலையில் ராய்கோட் முதல் தாகோட் வரையிலான 240 கிமீ தூரத்தை மேம்படுத்தவே இரு நாடுகளும் திட்டமிட்டு வருகின்றன.
இந்தப் பகுதி தான் பாகிஸ்தான் மற்றும் சீனாவை இணைக்கும் பகுதியாகவும், பாகிஸ்தான் ஆக்கிரமிப்பு காஷ்மீரின் வழியே பயணிக்கும் பகுதியாகவும் இருக்கிறது.
மேலும் சீனாவின் நிதி உதவியுடன், நெடுஞ்சாலை ஆராய்ச்சி மற்றும் பயிற்சி மையத்தையும் அமைக்கவிருக்கிறது பாகிஸ்தான். இதற்காக பாகிஸ்தானுக்கு 52 மில்லியன் டாலர்கள் நிதியுதவி அளிக்கிறது சீனா.
சீனா
சீனா மற்றும் பாகிஸ்தான் இடையேயான பிற ஒப்பந்தங்கள்:
மேற்கூறிய நெடுஞ்சாலையைத் தவிர்த்து, சீனாவின் உதவியுடன் பலுசிஸ்தான் மற்றும் டேரா இஸ்மாயில் கான் இடையே 150 கிமீ நீளமுடைய மற்றொரு சாலையையும் கட்டமைக்கவிருக்கிறது பாகிஸ்தான்.
இவை தவிர, பாகிஸ்தானின் ராணுவத்தை மேம்படுத்துவதற்கு தேவையான பல்வேறு உதவிகளையும் செய்து வருகிறது சீனா. மேலும், சீனாவின் தேசிய வானொலி மற்றும் தொலைத்தொடர்பு நிறுவனத்துடன் பாகிஸ்தானின் லியோஸ் தனியார் நிறுவனம் புரிந்துணர்வு ஒப்பந்தம் ஒன்றையும் மேற்கொண்டிருக்கிறது.
பாகிஸ்தானை தவிர திபெத்திலும் ருடொக் பகுதியில் ரெபெங் மற்றும் டிங்ஸிக்கு இடையே 120 கிமீ நீளத்திற்கான சாலை ஒன்றையும் கட்டமைத்து வருகிறது சீனா. இந்த ருடொக் பகுதியானது LAC (Line of Actual Control) பகுதிக்கு அருகே அமைந்திருப்பது குறிப்பிடத்தக்கது.