அமெரிக்காவில் இந்துக் கோயில் மீதான தாக்குதல் திட்டம்: இந்திய வெளியுறவு அமைச்சகம் கடும் கண்டனம்
செய்தி முன்னோட்டம்
அமெரிக்காவின் இல்லினாய்ஸ் மாகாணத்தில் உள்ள இந்துக் கோயில் மீது நடத்தத் திட்டமிடப்பட்ட வெகுஜனத் துப்பாக்கிச்சூடு முறியடிக்கப்பட்ட விவகாரம் தொடர்பாக இந்தியா தனது கவலையை வெளிப்படுத்தியுள்ளது. இதுகுறித்துத் டெல்லியில் செய்தியாளர்களைச் சந்தித்த வெளியுறவு அமைச்சகத்தின் செய்தித் தொடர்பாளர் ரந்தீர் ஜெய்ஸ்வால், அமெரிக்காவில் அதிகரித்து வரும் இந்திய வெறுப்பு மற்றும் இனவெறிக் கலாச்சாரத்திற்கு எதிராகக் கடுமையான நடவடிக்கைகள் எடுக்கப்பட வேண்டும் என வலியுறுத்தியுள்ளார்.
கருத்துகள்
வெளியுறவு அமைச்சகத்தின் முக்கியக் கருத்துகள்
இந்தச் சம்பவம் குறித்து அமைச்சகம் வெளியிட்ட செய்திக்குறிப்பில், இந்தச் சதியின் பின்னணியில் உள்ள இந்து எதிர்ப்பு மற்றும் இனவெறிக் கொள்கைகளும், குறிப்பாக இந்திய வம்சாவளியினரை இலக்காகக் கொண்டு வன்முறைத் தாக்குதல்கள் நடத்தத் திட்டமிடப்பட்டிருந்ததும் மிகுந்த அதிர்ச்சியளிக்கிறது என அமைச்சகம் குறிப்பிட்டுள்ளது.
சந்தேகத்திற்கிடமான நபரைக் கைது செய்து துரிதமாக செயல்பட்ட அமெரிக்கச் சட்ட அமலாக்க முகமைகளின் நடவடிக்கைகளை இந்தியா வரவேற்றுள்ளது.
அமெரிக்காவில் உள்ள இந்தியச் சமூகத்தினரின் பாதுகாப்பு மற்றும் பாதுகாப்பான சூழலை உறுதி செய்ய, இனவெறித் தாக்குதல்கள் மீது 'பூஜ்ஜிய சகிப்புத்தன்மை' கொள்கையைக் கடைப்பிடித்து உறுதியான நடவடிக்கைகளை எடுக்க வேண்டும் என வலியுறுத்தப்பட்டுள்ளது.
கைது
பின்னணியும் கைது நடவடிக்கையும்
பாலடைன் பகுதியை சேர்ந்த 19 வயதான அலெக்சாண்ட்ரோஸ் பாபோராகிஸ் என்பவர், கடந்த அக்டோபர் 11 அன்று துப்பாக்கிச்சூடு நடத்தத் திட்டமிட்ட போது கைது செய்யப்பட்டார்.
அவரிடம் நடத்தப்பட்ட சோதனையில், இந்தியர்களை கடுமையாகச் சாடிய 8 பக்க மேனிஃபெஸ்டோ மற்றும் அதிநவீன ஆயுதங்கள் கைப்பற்றப்பட்டது குறிப்பிடத்தக்கது.
இந்த வழக்கில் FBI தீவிர விசாரணை நடத்தி வருவதோடு, சிகாகோவில் உள்ள இந்தியத் தூதரகமும் நிலைமையை உன்னிப்பாகக் கவனித்து வருகிறது.