அமெரிக்காவில் கள்ள உறவு வைத்திருந்ததால் பதவி நீக்கப்பட்ட சீன வெளியுறவு அமைச்சர்
சீனாவின் முன்னாள் வெளியுறவு அமைச்சர் கின் கேங் அமெரிக்காவில் கள்ள உறவு வைத்திருந்தது தெரிய வந்ததால் தான் பதவி நீக்கப்பட்டார் என்ற செய்தி வெளியாகி உள்ளது. முன்னாள் சீன அமைச்சர் கின் கேங்கை காணவில்லை என்று பல நாட்கள் பரபரப்பாக பேசப்பட்டு வந்தது. இதற்கிடையில், சமீபத்தில், "காணாமல் போன" வெளியுறவுத்துறை அமைச்சர் கின் கேங் நீக்கப்பட்டு, அவருக்கு பதிலாக வாங் யீ என்பவர் சீனாவின் வெளியுறவு அமைச்சராக நியமிக்கப்பட்டார். ஆனால், முன்னாள் அமைச்சர் கின் கேங்க்கு என்ன ஆனது என்பது குறித்த தகவல் எதுவும் வெளியிடப்படவில்லை. இந்நிலையில், தற்போது, கின் கேங் குறித்த சர்ச்சைக்குரிய தகவல் ஒன்றை வால் ஸ்ட்ரீட் ஜர்னல் செய்தி நிறுவனம் வெளிட்டுள்ளது.
அமெரிக்காவால் சீனாவின் தேசிய பாதுகாப்பு கேள்விக்குறியாகுமா?
கின் கேங் அமெரிக்கத் தூதராகப் பணியாற்றியபோது, அங்கு ஒரு பெண்மணியுடன் அவர் கள்ள உறவு வைத்திருந்ததாகவும், அதனால் ஒரு குழந்தை பிறந்ததாகவும் வால் ஸ்ட்ரீட் ஜர்னல் தனது செய்தியில் கூறியுள்ளது. இந்த விஷயம் விசாரணையில் நிரூபிக்கப்பட்டதனால் தான், சீன அரசாங்கம் கின் கேங்கை பதவி நீக்கம் செய்ததாக கூறப்படுகிறது. சீனாவும் அமெரிக்காவும் எதிரி நாடுகள் என்பதால், ஒரு வெளியுறவு அமைச்சரின் கள்ள உறவு நாட்டின் பாதுகாப்பை கேள்விக்குறியாக்கிவிடும் என்று சீனா அஞ்சுகிறது. எனவே, இந்த விவகாரம் தேசிய பாதுகாப்பை சமரசம் செய்ததா இல்லையா என்பதை சீனா தற்போது விசாரித்து வருகிறது. ஆனால், இது குறித்த அதிகாரபூர்வ அறிவிப்பு எதுவும் இன்றுவரை வெளியிடப்படவில்லை.
இந்த காலவரிசையைப் பகிரவும்