இஸ்ரேலில் 'பயங்கரவாத சேனல்' அல் ஜசீராவை மூடுவதாக பெஞ்சமின் நெதன்யாகு உறுதி
செய்தி முன்னோட்டம்
இஸ்ரேலிய பிரதம மந்திரி பெஞ்சமின் நெதன்யாகு திங்களன்று தனது நாட்டில் அல் ஜசீராவின் செயல்பாடுகளை மூடுவதாக உறுதியளித்தார்.
மேலும் அது ஒரு "பயங்கரவாத சேனல்" என்று குறிப்பிட்டு, அது பயங்கரவாதத்தை பரப்புகிறது எனவும் கூறினார்.
இது சார்ந்த சட்டம் ஒன்று, நேற்று இஸ்ரேலிய பாராளுமன்றத்தில் இயற்றப்பட்ட போது பெஞ்சமின் இதனை தெரிவித்தார்.
நெதன்யாகுவின் இந்த உறுதிமொழி அல் ஜசீராவுக்கு எதிரான இஸ்ரேலின் நீண்டகால பகையை அதிகரித்துள்ளது.
அதேநேரத்தில், காசா போரை நிறுத்துவதற்கான மத்தியஸ்த முயற்சிகளில் ஈடுபட்டிருக்கும் தோஹா அரசாங்கத்துடன் பதட்ட உணர்வுகளையும் இந்த நடவடிக்கை அதிகரித்துள்ளது.
காரணம், இந்த சேனலின் தலைமையகம் கத்தார் ஆகும்.
இஸ்ரேலின் இந்த நடவடிக்கை குறித்து கத்தாரோ அல்லது ஒளிபரப்பு நிறுவனமோ உடனடியாக கருத்து தெரிவிக்கவில்லை.
கசந்த உறவு
தொடரும் இறுக்கமான உறவு
இஸ்ரேலுக்கு எதிராக நியாயமற்ற சார்பு இருப்பதாக குற்றம் சாட்டி, அல் ஜசீராவுடன் இஸ்ரேல் நீண்டகாலமாக ஒரு கசப்பான உறவைக் கொண்டுள்ளது.
சில ஆண்டுகளுக்கு முன்னர், காசாவில் இஸ்ரேலிய இராணுவத் தாக்குதலின் போது, அல் ஜசீரா நிருபர் ஷிரீன் அபு அக்லே கொல்லப்பட்டார். அவரை வேண்டுமென்றே கொன்றதாக இஸ்ரேல் மீது குற்றம் சாட்டியது, அல் ஜஸீரா சேனல்.
இருப்பினும், இஸ்ரேல் இந்த குற்றச்சாட்டை மறுத்தது.
ஹமாஸுக்கு எதிரான இஸ்ரேலின் போர் வெடித்ததைத் தொடர்ந்து அந்த உறவுகள் மேலும் மோசமடைந்தன.
டிசம்பர் 2023இல், தெற்கு காசாவில் நடந்த போரைப் பற்றி அல் ஜசீரா ஒளிப்பதிவாளர் அறிக்கை செய்தபோது இஸ்ரேலிய தாக்குதலால் கொல்லப்பட்டார். காசாவில் உள்ள சேனலின் பீரோ தலைவர் Wael Dahdouh அதே தாக்குதலில் காயமடைந்தார்.
அல் ஜசீரா
தொடர்ந்து குறிவைக்கப்பட்டனரா அல் ஜசீரா நிர்வாகத்தினர்?
இதனைத்தொடர்ந்து, கடந்த ஜனவரி மாதம் நடந்த ஏவுகணை தாக்குதலில், தஹ்தூவின் மகனைக் கொன்றதாக இஸ்ரேல் மீது அல்-ஜசீரா குற்றம் சாட்டியது.
ஹம்சா தஹ்துஹ் என பெயர் கொண்ட அவர், அல்-ஜசீராவில் பணிபுரிந்து கொண்டிருந்தபோது, அவர் பயணித்த கார் மீது ஏவுகணை தாக்குதல் நடைபெற்றது.
ஆனால், ஹம்சா தஹ்தூஹ், ஹமாஸுடன் இணைந்த தீவிரவாதக் குழுவான இஸ்லாமிய ஜிஹாத்தின் உறுப்பினர் என்று இஸ்ரேலிய இராணுவம் கூறியது.
கடந்த அக்டோபரில் மற்றொரு தாக்குதலில் Wael Dahdouhஇன் மனைவி, மகள், மகன், அவரது பேரன் கொல்லப்பட்டனர்.
தஹ்தூஹ், மருத்துவமனைக்குள் இறந்த தனது மகனின் உடலைப் பார்த்து கலங்கி நின்ற படங்களை அந்த சேனல் ஒளிபரப்பியது.
அல்-ஜசீரா சேனல், போர் முழுவதும் காசாவில் தங்கியிருக்கும் சில சர்வதேச ஊடகங்களில் ஒன்றாகும்.