இஸ்ரேல் வான்வெளி விதிகள் கெடுபிடி: பாகிஸ்தான் உள்ளிட்ட 31 நாடுகளின் விமானிகளுக்கு ஏர் பிரான்ஸ் மற்றும் யுனைடெட் ஏர்லைன்ஸ் தடை
செய்தி முன்னோட்டம்
இஸ்ரேலுடன் அதிகாரப்பூர்வ ராஜதந்திர உறவுகள் இல்லாத நாடுகளை சேர்ந்த விமானிகள் மற்றும் பணியாளர்கள் தங்களது வான்வெளியில் நுழைவதற்கு இஸ்ரேல் அரசு கெடுபிடிகளைத் தீவிரப்படுத்தியுள்ளது. இதனைத் தொடர்ந்து, பாகிஸ்தான் உட்பட 31 நாடுகளை சேர்ந்த விமானிகள் மற்றும் கேபின் ஊழியர்கள் இஸ்ரேலுக்கான விமானங்களை இயக்க ஏர் பிரான்ஸ் மற்றும் அமெரிக்காவின் யுனைடெட் ஏர்லைன்ஸ் ஆகிய சர்வதேச நிறுவனங்கள் தடை விதித்துள்ளன.
பின்னணி
கட்டுப்பாடுகளுக்கு காரணமான பின்னணிச் சம்பவம்
கடந்த செப்டம்பர் 30 அன்று துபாயில் இருந்து தல் அவீவ் நோக்கிச் சென்ற ஃப்ளைதுபாய் விமானத்தில், ஓமன் நாட்டைச் சேர்ந்த உதவி விமானி ஒருவர் பயங்கரவாதத் தாக்குதல் நடத்த முயன்ற சம்பவம் சர்வதேச வான்வழிப் போக்குவரத்தில் பெரும் அதிர்ச்சியை ஏற்படுத்தியது.
இஸ்ரேலுடன் தூதரக உறவு இல்லாத நாடுகளை சேர்ந்த ஊழியர்களுக்கான கட்டுப்பாடுகள் ஏற்கனவே காகித அளவில் இருந்தபோதிலும், இந்தச் சம்பவத்திற்குப் பிறகே இஸ்ரேலியப் புலனாய்வு அமைப்பான ஷின் பெட் மற்றும் போக்குவரத்து அமைச்சகம் இதனை மிகக் கடுமையாக அமல்படுத்தத் தொடங்கியுள்ளன.
செவ்வாய்க்கிழமை அன்று இந்தோனேசிய பைலட்டுடன் டெல் அவீவ் நோக்கிப் பறந்த எத்தியோப்பியன் ஏர்லைன்ஸ் விமானத்தை, வான்வெளியிலேயே இஸ்ரேலிய அதிகாரிகள் இடைமறித்துத் திருப்பி அனுப்பினார்கள்.
தடை
தடை விதிக்கப்பட்டுள்ள நாடுகள் மற்றும் ஏர்லைன்ஸ் நடவடிக்கை
யுனைடெட் ஏர்லைன்ஸ் மற்றும் ஏர் பிரான்ஸ் வெளியிட்ட அக்டோபர் 13 அறிக்கைகளின்படி, பாகிஸ்தான், ஓமன், இந்தோனேசியா, ஈரான், ஈராக், சவூதி அரேபியா, கத்தார், மலேசியா, பங்களாதேஷ் உள்ளிட்ட 31 நாடுகளின் குடியுரிமை அல்லது இரட்டை குடியுரிமை கொண்ட ஊழியர்கள் இஸ்ரேலிய வழித்தடங்களில் பணியமர்த்தப்பட மாட்டார்கள்.
பிரெஞ்சு ஊடகமான மீடியாபார்ட் தகவலின்படி, ஏர் பிரான்ஸ் நிறுவனம் தனது ஊழியர்களிடம் இரண்டாவது குடியுரிமை விவரங்களைக் கோரியுள்ளதுடன், பிற சர்வதேச விமான நிறுவனங்களும் இஸ்ரேலின் புதிய பாதுகாப்பு விதிமுறைகளுக்கு இணங்க தங்களது ஊழியர்கள் பட்டியலை மாற்றி அமைத்து வருகின்றன.