'இட ஒதுக்கீடு விவகாரத்தில் எனது கருத்து தவறாக புரிந்துகொள்ளப்பட்டுள்ளது'; ராகுல் காந்தி விளக்கம்
காங்கிரஸ் மூத்த தலைவரும், மக்களவை எதிர்க்கட்சித் தலைவருமான ராகுல் காந்தி, இந்தியாவில் இடஒதுக்கீடுகளை ரத்து செய்ய வேண்டும் என்று சமீபத்தில் கூறிய அறிக்கை தவறாக சித்தரிக்கப்பட்டது என்று தெளிவுபடுத்தியுள்ளார். அமெரிக்காவில் அவர் ஆற்றிய உரையில் இட ஒதுக்கீடு குறித்து பேசியதற்கு பாஜக கடுமையாக விமர்சனம் செய்த நிலையில் ராகுல் காந்தி விளக்கம் கொடுத்துள்ளார். அமெரிக்காவில் உள்ள தேசிய பத்திரிகையாளர் மன்றத்தில் நடந்த ஒரு நேர்காணலில் பேசிய ராகுல் காந்தி, "நேற்று யாரோ நான் இடஒதுக்கீட்டிற்கு எதிரானவன் என்று தவறாகக் கூறினர். 50% வரம்பிற்கு மேல் இடஒதுக்கீட்டை கொண்டு வருவோம்." என்று கூறினார்.
ராகுல் காந்தியின் சர்ச்சைப் பேச்சின் பின்னணி
முன்னதாக, செவ்வாயன்று (செப்டம்பர் 10) அமெரிக்காவின் ஜார்ஜ்டவுன் பல்கலைக்கழகத்தில் மாணவர்களுடன் கலந்துரையாடியபோது, இந்தியா நியாயமான இடத்தை அடையும் போது மட்டுமே இடஒதுக்கீட்டை ரத்து செய்வது குறித்து காங்கிரஸ் பரிசீலிக்கும் என்று ராகுல் காந்தி கூறியிந்தார். "நிதி எண்களைப் பார்க்கும்போது, பழங்குடியினருக்கு 100 ரூபாயில் 10 பைசாவும், தலித்துகளுக்கு 100 ரூபாயில் 5 ரூபாயும், ஓபிசியினருக்கு இதே எண்ணிக்கையும் கிடைக்கும். உண்மை என்னவென்றால், அவர்கள் தங்களுக்குரிய நியாயமான பங்கைப் பெறவில்லை என்பதே உண்மை." என்று ராகுல் காந்தி மேலும் கூறினார். ஜாதிவாரி கணக்கெடுப்பு குறித்து பேசிய அவர், இப்போது இது ஒரு தடுக்க முடியாத யோசனையாக வளர்ந்துள்ளதாகக் கூறினார்.
இந்தியாவில் ஜனநாயகத்தின் நிலை
இந்தியாவில் ஜனநாயகத்தின் நிலை குறித்து கவலை தெரிவித்த அவர், கடந்த 10 ஆண்டுகளாக தாக்குதலுக்கு உள்ளானதாகவும், ஆனால் தற்போது மீண்டும் போராடி வருவதாகவும் தெரிவித்தார். ஆர்எஸ்எஸ் மற்றும் பாஜக மாநிலங்கள், மொழிகள், மதங்கள் மற்றும் சமூகங்களுக்கு இடையே ஒரு படிநிலையை ஊக்குவிப்பதாக குற்றம் சாட்டினார். "இந்தியாவை மாநிலங்களின் ஒன்றியம் என்பார்கள். இது யூனியன் அல்ல என்கிறார்கள். இவை தனித்தனி விஷயங்கள்" என்று அவர் கூறினார். அமெரிக்காவில் ராகுல் காந்தி பேசிய விஷயங்கள் பாஜக தலைவர்களிடமிருந்து விமர்சனங்களைத் தூண்டியுள்ளன. மத்திய அமைச்சர் அமித் ஷா ராகுல் காந்தியின் கருத்துகளை தேச விரோதம் என்று குறிப்பிட்டார். மேலும், தேசத்தின் பாதுகாப்புக்கு அச்சுறுத்தல் மற்றும் உணர்வுகளை புண்படுத்தும் இதுபோன்ற அறிக்கைகளை அவர் வழக்கமாக விடுவதாக குற்றம் சாட்டினார்.
