புகார்களை திரும்ப பெற கட்டாயப்படுத்தும் அதிகாரிகள் : இந்திய மல்யுத்த வீராங்கனைகள் பரபரப்பு குற்றச்சாட்டு
இந்திய மல்யுத்த சம்மேளனத்தின் அதிகாரிகள் சிலர் பெண் மல்யுத்த வீரர்களை அச்சுறுத்துவதாகவும், தலைவர் பிரிஜ் பூஷன் சரண் சிங்கிற்கு எதிரான பாலியல் துன்புறுத்தல் புகார்களை திரும்பப் பெறும்படி கட்டாயப்படுத்துவதாகவும் மல்யுத்த வீராங்கனை வினேஷ் போகட் செவ்வாய்க்கிழமை (ஏப்ரல் 25) குற்றம் சாட்டினார். ஏழு பெண் மல்யுத்த வீரர்களின் ஒற்றுமையை உடைக்க முயற்சிகள் மேற்கொள்ளப்பட்டு வருவதாக அவர் கூறினார். வினேஷ் போகட் இது குறித்து கூறுகையில், "புகார்தாரர்களின் குடும்ப உறுப்பினர்களுக்கு இப்போது மிரட்டல்கள் வருகின்றன. அவர்களின் உயிருக்கு ஆபத்து உள்ளது. போலீசார் எப்ஐஆர் பதிவு செய்து நடவடிக்கை எடுக்க வேண்டும். புகார்தாரர்களுக்கு ஏதாவது நடந்தால், டெல்லி காவல்துறையும் அரசாங்கமும் அதற்கு பொறுப்பாகும்." என்று தெரிவித்துள்ளார்.
அரசின் நடவடிக்கையால் மல்யுத்த வீரர்கள் அதிருப்தி
முன்னதாக, ஞாயிற்றுக்கிழமை (ஏப்ரல் 23) பஜ்ரங் புனியா, வினேஷ் மற்றும் சாக்ஷி மாலிக் உள்ளிட்ட நாட்டின் முன்னணி மல்யுத்த வீரர்கள் டெல்லி ஜந்தர் மந்தரில் மீண்டும் போராட்டத்தை தொடங்கியதோடு, இந்திய மல்யுத்த சம்மேளன தலைவருக்கு எதிராக எப்ஐஆர் பதிவு செய்யப்பட வேண்டும் என்று கோரினர். பிரிஜ் பூஷனுக்கு எதிரான பாலியல் துன்புறுத்தல் குற்றச்சாட்டுகளை விசாரித்த மேற்பார்வைக் குழுவின் அறிக்கையின் முடிவுகளை அரசாங்கம் பகிரங்கப்படுத்த வேண்டும் என்றும் அவர்கள் கோருகின்றனர். மூன்று மாதங்களுக்கு முன்பு பிரிஜ் பூஷனுக்கு எதிராக விளையாட்டு அமைச்சகம் நடவடிக்கை எடுக்காதது குறித்து வினேஷ் தனது ஏமாற்றத்தை வெளிப்படுத்தினார்.
