ஸ்போர்ட்ஸ் ரவுண்டு அப்: இன்றைய முக்கிய விளையாட்டு செய்திகள்
செய்தி முன்னோட்டம்
IND vs AFG 3-வது டி20 போட்டி பெங்களுருவிலுள்ள சின்னசாமி ஸ்டேடியத்தில் நேற்று இரவு நடைபெற்றது.
இதில் டாஸ் வென்ற இந்தியா முதலில் பேட்டிங்கை தேர்வு செய்தது. இந்தப் போட்டியில் இரு அணிகளும் 212 ரன்கள் எடுத்த நிலையில், ஆட்டத்தில் முடிவை எட்ட இரண்டு முறை (டபுள்) சூப்பர் ஓவர் வீசப்பட்டது.
சூப்பர் ஓவரில் முதலில் பேட் செய்த ஆப்கானிஸ்தான் 16 ரன்கள் எடுத்தது. தொடர்ந்து ஆடிய இந்தியாவும் 16 ரன்கள் எடுக்கவே, மீண்டும் சூப்பர் ஓவர் வீச முடிவு செய்யப்பட்டது.
2-வது சூப்பர் ஓவரில் ஆப்கானிஸ்தானுக்கு 12 ரன்கள் தேவைப்பட்டது.
அதில் அந்த அணி தோல்வியை தழுவவே, 3 போட்டிகள் கொண்ட இந்த தொடரை முழுவதுமாக வென்றுள்ளது இந்தியா.
card 2
கேலோ இந்தியா போட்டிக்கான அனுமதி சீட்டை செயலி மூலம் பெறலாம்
தமிழகத்தில் நடைபெறவுள்ள 6-வது கேலோ இந்தியா இளைஞர் விளையாட்டுப் போட்டிகளை பொதுமக்கள் நேரில் காண வசதியாக செயலி மற்றும் இணையதளம் வாயிலாக அனுமதிச் சீட்டுகளைப் பெற தமிழ்நாடு விளையாட்டு மேம்பாட்டு ஆணையம் ஏற்பாடு செய்துள்ளது.
இது குறித்து அறிவிப்பும் வெளியாகியுள்ளது.
அதில், இப்போட்டியை நேரில் காண விரும்பும் பார்வையாளர்கள் TNSPORTS (ஆடுகளம்) என்ற செயலியின் மூலமாகவோ https://www.sdat.tn.gov.in என்ற தமிழ்நாடு விளையாட்டு மேம்பாட்டு ஆணையத்தின் இணையதளம் வாயிலாகவோ தங்களது விவரங்களைப் பதிவு செய்து கொள்ள வேண்டும்.
இதில் போட்டி நடைபெறும் மாவட்டம், விளையாட்டு மற்றும் தேதியை தேர்வு செய்து பதிவு செய்ய வேண்டும்.
பின்னர் தங்களது அனுமதிச் சீட்டை பதிவிறக்கம் செய்து பயன்படுத்த வேண்டும் என கூறப்பட்டுள்ளது.
card 3
கேலோ இந்தியா: கபடி போட்டிகள் இன்று தொடங்குகிறது
6-வது கேலோ இந்தியா இளைஞர் போட்டி நாளை (டிசம்பர் 19-ஆம் தேதி) துவங்குகிறது.
சென்னை, கோயம்பத்தூர், திருச்சி, மதுரை ஆகிய 4 இடங்களில் நடைபெறும் இந்த போட்டிகள், வரும் 31-ம் தேதி வரை நடைபெற உள்ளது.
எனினும் கேலோ இந்தியாவின் மகளிர் கபடி போட்டிகள் மட்டும் இன்று தொடங்குகின்றன. மகளிர் கபடியில் 8 அணிகள் கலந்து கொள்கின்றன.
இவை 'ஏ', 'பி' என இரண்டு பிரிவாக பிரிக்கப்பட்டுள்ளது.
இதில் 'ஏ' பிரிவில் இடம்பெற்றுள்ள தமிழ்நாடு அணி இன்று மாலை 4 மணிக்கு நடைபெறும் தொடக்க ஆட்டத்தில் ஹரியானாவுடன் மோதுகிறது.
card 4
ஆஸ்திரேலிய ஓபன் டென்னிஸ்
ஆஸ்திரேலியாவின் மெல்பர்ன் நகரில் நடைபெற்று வரும் ஆஸ்திரேலியா ஓபன் டென்னிஸ் தொடரில், ஆடவர் ஒற்றையர் பிரிவு 2-வது சுற்றில் முதல்நிலை வீரரான செர்பியாவின் நோவக் ஜோகோவிச், ஆஸ்திரேலியாவின் அலெக்ஸி பாபிரினுடன் மோதினார்.
3 மணி நேரம் 11 நிமிடங்கள் நடைபெற்ற இந்த ஆட்டத்தில் ஜோகோவிச் வெற்றி பெற்று 3-வது சுற்றுக்கு முன்னேறினார்.
மகளிர் ஒற்றையர் பிரிவு 2-வது சுற்றில் துனிசியாவின் ஆன்ஸ்ஜபூர் 0-6, 2-6 என்ற நேர் செட் கணக்கில் ரஷ்யாவின் மிரா ஆன்ட்ரீவாவிடம் தோல்வி அடைந்தார்.
பெலாரசின் அரினா சபலெங்கா, செக்குடியரசின் பிரெண்டா ஃப்ருஹ்விர் டோவாவையும் அமெரிக்காவின் கோ கோ காஃப், சகநாட்டைச்சேர்ந்த கரோலின் டோல்ஹைடையும்,பிரேசிலின் பீட்ரிஸ் ஹடாத் மியா, ரஷ்யாவின் அலினா கோர்னீவாவையும் வீழ்த்தி 3-வது சுற்றில் கால்பதித்தனர்.
card 5
டி20 கிரிக்கெட்டில் 5 சதங்கள் அடித்து ரோஹித் ஷர்மா சாதனை
ஆப்கானிஸ்தானுக்கு எதிரான 3ஆவது டி20 கிரிக்கெட்டில், ரோஹித் ஷர்மா சதம் அடித்ததன் மூலமாக டி20 கிரிக்கெட்டில் அதிக சதங்கள் அடித்த வீரர் என்ற சாதனையை படைத்துள்ளார்.
நேற்று நடைபெற்ற போட்டியில், இந்திய அணியின் கேப்டன் ரோஹித் ஷர்மா, டாஸ் வென்று பேட்டிங் செய்தார்.
தொடக்க ஆட்டக்காரர்களாக யஷஸ்வி ஜெய்ஸ்வால் மற்றும் ரோஹித் ஷர்மா இருவரும் களமிறங்கினர்.
தொடர்ச்சியாக அணியின் வீரர்கள் சொற்ப ரன்களில் ஆட்டமிழக்கவே, ரோஹித் ஷர்மா நிதானத்தை கடைபிடிக்க வேண்டிய கட்டாயத்தில் இருந்தார்.
ரிங்கு சிங் களமிறங்கியதும், அதிரடி காட்ட துவங்கிய ரோஹித், 64 பந்துகளில் டி20 கிரிக்கெட்டில் தனது 5ஆவது சதத்தை பூர்த்தி செய்து சாதனை படைத்தார். மேலும், 5 சதங்கள் அடித்த முதல் வீரர் என்ற சாதனையை படைத்தார்.