Sports Round Up: உலகக்கோப்பை தொடரிலிருந்து வெளியேறிய பாண்டியா; போல் பொசிஷனை வென்ற மேக்ஸ் வெர்ஸ்டப்பன்; முக்கிய விளையாட்டுச் செய்திகள்
செய்தி முன்னோட்டம்
ஒருநாள் உலகக்கோப்பை தொடரின் நேற்றைய போட்டியில் ஆஃப்கானிஸ்தான் மற்றும் நெதர்லாந்து அணிகள் போட்டியிட்டன. நேற்றைய போட்டிக்கான டாஸை வென்ற நெதர்லாந்து அணியின் கேப்டன் ஸ்காட் எட்வர்ட்ஸ் முதலில் பேட்டிங்கை தேர்வு செய்தார்.
முதலில் பேட்டிங் செய்த நெதர்லாந்து அணியின் பின்வரிசை பேட்டர்கள் சொதப்ப 46.3 ஓவர்களில் 179 ரன்கள் குவிப்பிற்கே அனைத்து விக்கெட்டுகளையும் இழந்தது நெதர்லாந்து.
அதனைத் தொடர்ந்து ஆடிய ஆஃப்கானிஸ்தான் நிதானமான ஆட்டத்தை வெளிப்படுத்தி, 31.3 ஓவர்களிலேயே மூன்று விக்கெட்டுகள் இழப்பிற்கு எளிதாக இலக்கை சேஸ் செய்து நெதர்லாந்தை வீழ்த்தியது.
இந்த இரு அணிகளும் முதல் முறையாக ஒருநாள் உலகக்கோப்பை தொடரில் சந்தித்துக் கொள்வது குறிப்பிடத்தக்கது.
கிரிக்கெட்
புதிய சாதனை படைத்த முகமது ஷமி:
இதுவரை ஒருநாள் உலகக்கோப்பை தொடர்களில் அதிக விக்கெட்டுகளை வீழ்த்திய இந்திய பந்துவீச்சாளர்களில் ஜவகல் ஸ்ரீநாத் மற்றும் ஜாகீர் கானை பின் தள்ள முதலிடம் பிடித்திருக்கிறார் முகமது ஷமி.
முன்னதாக இலங்கைக்கு எதிராக நடைபெற்ற ஆட்டத்தில் ஐந்து விக்கெட்டுகளை வீழ்த்தி, நடப்பு ஒருநாள் உலகக்கோப்பை தொடரில் மட்டும் 14 விக்கெட்டுகளை வீழ்த்தியிருக்கிறார்.
ஜவகல் ஸ்ரீநாத் மற்றும் ஜாகீர் கார் ஆகியோர் ஒருநாள் உலகக்கோப்பை தொடர்களில் ஒட்டுமொத்தமாக 44 விக்கெட்டுகளை வீழ்த்தியிருக்கும் நிலையில், 45 விக்கெட்டுகளை வீழ்த்தி தற்போது முன்னணியில் இருக்கிறார் முகமது ஷமி. இதன் மூலம் புதிய சாதனையையும் படைத்திருக்கிறார் அவர்.
இந்தியா
உலகக்கோப்பை தொடரில் இருந்து ஹர்திக் பாண்டியா வெளியேற்றம்:
இந்திய அணியின் முக்கியமான மற்றும் பிரதான ஆல்ரவுண்டரான ஹர்திக் பாண்டியா கணுக்கால் காயத்தால் பாதிக்கப்பட்டுள்ளார். அந்த காயத்திலிருந்து அவர் இன்னும் மீளாததையடுத்து, அடுத்து நடைபெறவிருக்கும் உலகக்கோப்பை போட்டிகளில் அவர் விளையாட மாட்டார் என அறிவித்திருக்கிறது இந்திய கிரிக்கெட் வாரியம்.
ஹர்திக் பாண்டியாவுக்கு மாற்றாக, இந்த இளம் வேகப்பந்துவீச்சாளர் பிரசித் கிருஷ்ண உலகக்கோப்பை அணியில் சேர்க்கப்பட்டிருக்கிறார்.
லீக் போட்டிகளைத் தொடர்ந்து, அரையிறுதி மற்றும் இறுதிப்போட்டிகளில் பலமான அணிகளை இந்தியா எதிர்கொள்ளவிருக்கும் நிலையில், ஹர்திக் பாண்டியாவின் இழப்பு இந்திய அணிக்கு மிக மோசமான ஒரு பின்னடைவாக வந்தமைந்திருக்கிறது.
நேபாளம்
டி20 உலகக்கோப்பைக்கு தகுதி பெற்ற நேபாளம்:
அடுத்த ஆண்டு நடைபெறவிருக்கும் டி20 கிரிக்கெட் உலகக்கோப்பை தொடரானது, மேற்கிந்திய தீவுகள் மற்றும் அமெரிக்காவின் நடைபெறவிருக்கிறது. இந்தத் தொடரில் தான் முதல் முறையாக 20 அணிகள் பங்கேற்கவிருக்கின்றன.
இந்தத் தொடரில் பங்கெடுக்க உலகின் அனைத்துப் பகுதிகளிலும் இருக்கும் அணிகளுக்கும் குவாலிஃபையர் சுற்றுகளை நடத்தி வருகிறது சர்வதேச கிரிக்கெட் வாரியம்.
யுஏஐ அணியை வீழ்த்தியதன் மூலம் 2024ம் ஆண்டு நடைபெறவிருக்கும் இந்தத் தொடரில் பங்கெடுப்பதற்கான தகுதியைப் பெற்றிருக்கிறது நேபாள கிரிக்கெட் அணி.
நேபாள அணி மட்டுமின்றி, பஹ்ரைன் அணியை பத்து விக்கெட் வித்தியாசத்தில் தோற்கடித்து ஓமன் அணியும் டி20 உலகக்கோப்பையில் பங்குபெற தகுதி பெற்றிருக்கிறது.
F1
பிரேசிலியன் கிராண்டு பிரிக்ஸ்:
பிரேசிலில் இன்று நடைபெறும் பிரேசிலியின் கிராண்டு பிரிக்ஸ் போட்டியில் போல் பொஷிசனை பெற்றிருக்கிறார் நடப்பு சாம்பியன் மேக்ஸ் வெர்ஸ்டப்பன்.
சாவ் பாவுலோவின் இன்டர்லாகோஸ் சர்க்யூட்டில் நேற்று நடைபெற்ற தகுதித் சுற்றில் சிறப்பாக செயல்பட்டு இன்றைய போட்டிக்கான போல் பொசிஷனை வென்றிருக்கிறார் அவர்.
சாவ் பாவுலோவில் மேக்ஸ் வெர்ஸ்டப்பனின் இரண்டாவது போல் பொசிஷன் இதுவாகும். மேக்ஸ் வெர்ஸ்டப்பனைத் தொடர்ந்து இரண்டாவது இடத்தில் சார்ஸ் லெக்லெர்க்கும், மூன்றாவது இடத்தில் லேன்ஸ் ஸ்ட்ரோலும் போட்டியைத் தொடங்கவிருக்கிறார்கள்.
1'10.727 என்ற நேரத்தில் முடித்து மேக்ஸ் வெர்ஸ்டப்பன் போல் பொசிஷனை பெற்ற நிலையில், அவரை விட 0.294 நொடிகள் தாமதமாக வந்து இரண்டாவது இடம் பிடித்திருக்கிறார் லெக்லெர்க்.