தற்காலிக தலைவர் ராஜீவ் சுக்லா தலைமையில் புதிய ஸ்பான்சரை இறுதி தேடும் பணியை முடுக்கி விட்டுள்ளது பிசிசிஐ
செய்தி முன்னோட்டம்
இந்திய அணியின் முன்னாள் கிரிக்கெட் வீரர் ரோஜர் பின்னி இந்திய கிரிக்கெட் கட்டுப்பாட்டு வாரியத்தின் (பிசிசிஐ) தலைவர் பதவியிலிருந்து விலகியதாகத் தகவல்கள் தெரிவிக்கின்றன. இதையடுத்து, பிசிசிஐயின் துணைத் தலைவரான ராஜீவ் சுக்லா, அடுத்த தேர்தல் வரை தற்காலிகத் தலைவராகப் பொறுப்பேற்றுள்ளார். சமீபத்தில் 70 வயதை நிறைவு செய்த பின்னி, பிசிசிஐயின் வயது உச்சவரம்பு விதிகளின் காரணமாகவே இந்தப் பதவியிலிருந்து விலகியதாகக் கூறப்படுகிறது. உச்ச நீதிமன்றத்தால் பரிந்துரைக்கப்பட்ட லோதா குழுவின் பரிந்துரைகளின்படி, பிசிசிஐ தலைவர் 70 வயதுக்கு மேல் இருக்கக் கூடாது. இந்த விதி, தேசிய விளையாட்டு நிர்வாக மசோதா 2025 இல் 75 ஆக உயர்த்தப்பட்டிருந்தாலும், அந்த மசோதா இன்னும் அமலுக்கு வரவில்லை. இதனால், நடப்பு விதிகளின்படி பின்னி பதவியில் நீடிக்கத் தகுதியற்றவரானார்.
கூட்டம்
பிசிசிஐ முக்கிய கூட்டம்
ரோஜர் பின்னி விலகிய நிலையில் தற்காலிகமாக தலைமைப் பொறுப்பை ஏற்றுள்ள ராஜீவ் சுக்லா, சமீபத்தில் நடைபெற்ற பிசிசிஐ உச்சநிலைக் குழுக் கூட்டத்திற்குத் தலைமை தாங்கினார். அந்தக் கூட்டத்தில் முக்கிய நிகழ்ச்சி நிரல்களில் ஒன்றாக, ட்ரீம்11 நிறுவனத்துடனான ஸ்பான்சர்ஷிப் ஒப்பந்தத்தை ரத்து செய்துவிட்டு, செப்டம்பர் 9 ஆம் தேதி தொடங்கும் ஆசிய கோப்பை 2025 க்கு முன்னதாக இந்திய கிரிக்கெட் அணிக்கு ஒரு புதிய ஸ்பான்சரைத் தேடுவதும் இருந்துள்ளது. பிசிசிஐ வட்டாரங்களின்படி, செப்டம்பர் 9 ஆம் தேதி தொடங்கும் ஆசியக் கோப்பைக்கு முன்னதாக ஒரு புதிய ஸ்பான்சர்ஷிப் ஒப்பந்தத்தை இறுதி செய்ய பிசிசிஐ போராடி வருகிறது. பிசிசிஐ 2027 ஒருநாள் உலகக்கோப்பை வரை, ஒரு நீண்ட கால ஸ்பான்சரைப் பெறுவதில் கவனம் செலுத்தி வருகிறது.