பும்ரா-சஞ்சனா தம்பதிக்கு ஆண் குழந்தை!
செய்தி முன்னோட்டம்
காயத்தின் காரணமாக ஒரு வருடமாக கிரிக்கெட்டில் இருந்து விலகி இருந்து பும்ரா, மீண்டும் முக்கியமான தொடரான ஆசிய கோப்பைத் தொடரில் இந்திய அணியுடன் இணைந்திருக்கிறார். மேலும், உலக கோப்பைத் தொடரிலும் பும்ரா தேர்வு செய்யப்படவிருப்பதாகவே தகவல்கள் வெளியாகியிருக்கின்றன. ஆசிய கோப்பைத் தொடரில் பாகிஸ்தான் அணிக்கு எதிரான இந்தியாவின் முதல் போட்டியில், இந்தியா பேட்டிங் செய்த பிறகு மழை குறுக்கிட்டதால் ஆட்டம் கைவிடப்பட்டது. மேலும், முக்கியமான இந்தத் தொடரில் இன்னும் ஒரு போட்டியில் கூட அவர் பந்து வீசவில்லை. ஆனால், இதற்கிடையில் தனிப்பட்ட காரணங்களுக்காக மும்பை சென்றிருப்பதால், இன்று நேபாளுக்கு எதிராக நடைபெறவிருக்கும் போட்டியில் அவர் பங்கேற்க மாட்டார் எனத் தகவல் வெளியானது.
கிரிக்கெட்
பும்ராவிற்கு ஆண் குழந்தை:
இந்நிலையில், தனக்கு ஆண் குழந்தை பிறந்திருப்பதாக இஸ்டாகிராம் தளத்தில் புகைப்படத்துடன் பகிர்வொன்றைப் பகிர்ந்திருக்கிறார் பும்ரா. ஆம், ஜஸ்பிரித் பும்ரா - சஞ்சனா கணேசன் தம்பதிக்கு ஆண் குழந்தை பிறந்திருக்கிறது. 'எங்கள் சிறிய குடும்பம் வளர்ந்திருக்கிறது. நாங்கள் மிகவும் மகிழ்ச்சியில் இருக்கிறோம்' என இன்ஸ்டாகிராமில் பதிவிட்டிருக்கும் அவர், இன்று காலை குழந்தை பிறந்திருப்பதாகவும் அந்த இன்ஸ்டாகிராம் பதிவில் குறிப்பிட்டிருக்கிறார். ஆசிய கோப்பைத் தொடரில், இந்தியாவின் குழுச் சுற்றுப் போட்டிகள் இன்றுடன் நிறைவடையும் நிலையில், சூப்பர் 4 சுற்றில் இந்திய அணியுடன் பும்ரா இணைவார் என எதிர்பார்க்கப்படுகிறது.