அர்ஜென்டினாவில் கடைசி போட்டி இதுதான்? ஓய்வு பெறுவதை மறைமுகமாகக் குறிப்பிட்ட லியோனல் மெஸ்ஸி
செய்தி முன்னோட்டம்
அர்ஜென்டினா கால்பந்து நட்சத்திரம் லியோனல் மெஸ்ஸி, தேசிய அணியில் தனது எதிர்காலம் குறித்து முக்கியத் தகவலை வெளியிட்டுள்ளார். செப்டம்பர் 4 அன்று வெனிசுவேலாவுக்கு எதிராக பியூனஸ் ஏர்ஸில் நடைபெற உள்ள கால்பந்து உலகக்கோப்பை தகுதிச் சுற்றுப் போட்டி, அர்ஜென்டினாவின் சொந்த மண்ணில் அவருக்குக் கடைசிப் போட்டியாக இருக்கலாம் என்று அவர் மறைமுகமாகக் குறிப்பிட்டுள்ளார். இந்த ஆட்டம் தனக்கு மிகவும் சிறப்பு வாய்ந்த போட்டி என்று மெஸ்ஸி தெரிவித்துள்ளார். அர்ஜென்டினா அணி தென் அமெரிக்கத் தகுதிச் சுற்றில் 35 புள்ளிகளுடன் முதலிடத்தில் இருந்து, 2026 உலகக் கோப்பைக்கு ஏற்கெனவே தகுதி பெற்றுவிட்டபோதிலும், மெஸ்ஸியின் கவனம் இந்தப் போட்டியின் உணர்வுபூர்வமான முக்கியத்துவத்தின் மீது உள்ளது.
குடும்பம்
குடும்பத்தினர் முன்னிலையில் விளையாட திட்டம்
தனது மனைவி, குழந்தைகள், பெற்றோர், சகோதரர்கள் மற்றும் குடும்பத்தினருடன் இந்தப் போட்டியில் கலந்துகொண்டு, தனது சொந்த மண்ணில் கடைசிப் போட்டி இருக்கலாம் என்ற எண்ணத்துடன் அவர் அனுபவிக்க திட்டமிட்டுள்ளார். "இது எனக்கு மிகவும் சிறப்பு வாய்ந்த போட்டி, ஏனெனில் இதுதான் கடைசித் தகுதிச் சுற்றுப் போட்டி." என்று மெஸ்ஸி ஆப்பிள் டிவியிடம் கூறினார். "அதன் பிறகு நட்புப் போட்டி அல்லது வேறு போட்டிகள் இருக்குமா என்று எனக்குத் தெரியவில்லை, ஆனால் இது மிகவும் சிறப்பு வாய்ந்த போட்டி, அதனால்தான் எனது குடும்பத்தினர் அனைவரும் என்னுடன் இருப்பார்கள்." என்று தெரிவித்தார். அவர் அதிகாரப்பூர்வமாக ஓய்வு குறித்து எந்த அறிவிப்பையும் வெளியிடவில்லை என்றாலும், இந்த அறிக்கை அர்ஜென்டினா தேசிய அணியில் அவரது முடிவைக் குறிப்பதாகவே உள்ளது.