2036 ஒலிம்பிக் இந்தியாவில் நடக்குமா? 40 ஆண்டுகளுக்கு பிறகு இந்தியாவில் நடக்கும் சர்வதேச ஒலிம்பிக் கமிட்டி கூட்டம்!
சர்வதேச ஒலிம்பிக் கமிட்டி (ஐஓசி) திங்களன்று (மார்ச் 6) 140 வது ஐஓசி அமர்வு மும்பையில் அக்டோபர் 15 முதல் 17 வரை நடைபெறும் என்று அறிவித்துள்ளது. ஐஓசி வெளியிட்டுள்ள செய்திக்குறிப்பின்படி, ஐஓசி அமர்வுக்கு முன்னதாக அக்டோபர் 12 மற்றும் 13 ஆம் தேதிகளில் ஐஓசி நிர்வாகக் குழு கூட்டம் நடைபெறும் என்றும், ஐஓசி அமர்வின் தொடக்க விழா அக்டோபர் 14 ஆம் தேதி தொடங்கும் என்றும் தெரிவிக்கப்பட்டுள்ளது. பிப்ரவரி 2022 இல் பெய்ஜிங்கில் நடைபெற்ற 139வது அமர்வின் போது 140வது ஐஓசி அமர்வை இந்தியாவில் நடத்துவதற்கான முடிவு அதன் உறுப்பினர்களால் எடுக்கப்பட்டது. 75 உறுப்பினர்கள் அதற்கு ஆதரவாகவும் ஒருவர் எதிராகவும் வாக்களித்ததை அடுத்து, நிகழ்வை நடத்துவதற்கான முயற்சியில் இந்தியா வெற்றி பெற்றது.
கூட்டத்தில் விவாதிக்கப்படும் அம்சங்கள்
1983 ஆம் ஆண்டு புதுடெல்லியில் 86வது பதிப்பு கூட்டம் நடைபெற்ற நிலையில், அதன் பிறகு 40 ஆண்டுகளுக்குப் பிறகு ஐஓசி அமர்வு மீண்டும் இந்தியாவில் நடக்க உள்ளது. ஐஓசி அமர்வு, அதன் உறுப்பினர்களின் பொதுக் கூட்டம், வருடத்திற்கு ஒரு முறையாவது நடைபெறும். இதில் வரவிருக்கும் நிகழ்வுகள், விளையாட்டுத் துறைகள் அல்லது சர்வதேச கூட்டமைப்புகளைச் சேர்ப்பது அல்லது விலக்குவது மற்றும் அதன் ஒலிம்பிக் சாசனத்தில் மாற்றங்கள் மற்றும் ஒலிம்பிக் போட்டிகளை நடத்தும் நகரங்களைத் தீர்மானிப்பது போன்றவை விவாதிக்கப்படும். 2036 ஒலிம்பிக்கை இந்தியா நடத்த விருப்பம் தெரிவித்துள்ள நிலையில், ஐஓசி அமர்வில் இது குறித்து முக்கிய முடிவு எடுக்கப்படலாம் என எதிர்பார்க்கப்படுகிறது.
