மகாபலிபுரத்தில் சர்வதேச மகளிர் கால்பந்து போட்டி; இந்தியா U20 உஸ்பெகிஸ்தானுடன் மோதல்
செய்தி முன்னோட்டம்
2026 AFC U20 மகளிர் ஆசிய கோப்பைக்கான ஆயத்தப் பணிகளின் ஒரு பகுதியாக, இந்திய U20 மகளிர் கால்பந்து அணி, உஸ்பெகிஸ்தான் அணிக்கு எதிராக இரண்டு நட்புப் போட்டிகளில் விளையாடவுள்ளது. இந்தப் போட்டிகள் நவம்பர் 29 மற்றும் டிசம்பர் 2 ஆகிய தேதிகளில் மகாபலிபுரத்தில் உள்ள எஃப்சி மெட்ராஸ் அகாடமி மைதானத்தில் நடைபெறவுள்ளன. இந்த இரண்டு போட்டிகளும் ஃபிஃபா மகளிர் சர்வதேசப் போட்டி அட்டவணையின் கீழ் மாலை 5 மணிக்குத் தொடங்கவிருக்கின்றன. இந்திய அணியின் தலைமைப் பயிற்சியாளர் ஜோகிம் அலெக்சாண்டர்சன், இந்தப் போட்டிகளுக்காக 24 பேர் கொண்ட இந்திய அணியை அறிவித்துள்ளார்.
ஆசிய கோப்பை
ஆசிய கோப்பை விபரம்
ஆசியக் கோப்பைக்கான இந்திய U20 அணி, ஜப்பான், ஆஸ்திரேலியா மற்றும் சீன தைபே ஆகிய அணிகளுடன் குரூப் சி பிரிவில் இடம்பெற்றுள்ளது. இதே கோப்பைக்குத் தகுதி பெற்ற உஸ்பெகிஸ்தான் அணி, டிபிஆர் கொரியா, கொரியா குடியரசு மற்றும் ஜோர்டான் ஆகிய அணிகளுடன் குரூப் பி பிரிவில் உள்ளது. முன்னதாக, இந்திய அணி, கடந்த மாதம் கஜகஸ்தான் U19 அணிக்கு எதிராக இரண்டு நட்புப் போட்டிகளில் விளையாடி, ஒன்றில் வெற்றி (3-2) மற்றும் ஒன்றில் சமன் (1-1) செய்தன. நவம்பர் 11ஆம் தேதி முதல் எஃப்சி மெட்ராஸ் அகாடமியில் இந்திய மகளிர் கால்பந்து அணி தீவிரப் பயிற்சியில் ஈடுபட்டு வருவது குறிப்பிடத்தக்கது.