ஆசிய விளையாட்டுப் போட்டிகளில் இந்தியாவுக்கு இன்று மேலும் 5 பதக்கங்கள்
செய்தி முன்னோட்டம்
தற்போது நடைபெற்று வரும் ஆசிய விளையாட்டுப் போட்டிகளில், துப்பாக்கிச் சூட்டிலேயே தற்போது வரை அதிக பதக்கங்களை வென்றிருக்கும் இந்தியா, இன்றும் அதே விளையாட்டில் மேலும் நான்கு பதக்கங்களையும் வென்று, உலக சாதனையையும் முறியடித்திருக்கிறது.
துப்பாக்கிச் சூட்டில், 10மீ ஏர் பில்டல் பிரிவில் ஈஷா சிங், பாலக் மற்றும் திவ்யா TS ஆகியோர் அடங்கிய இந்திய மகளிர் அணி வெள்ளிப் பதக்கம் வென்றது.
அதனைத் தொடர்ந்து 50மீ ரைபிள் 3P பிரிவில், ஸ்வப்னில் குசாலே, ஆஷ்வரி டோமர் மற்றும் அகில் ஷெரோனன் ஆகியோர் அடங்கிய இந்திய ஆடவர் அணி தங்கப் பதக்கத்தை தட்டிச் சென்றது.
இந்த ஆடவர் அணியானது 1769 புள்ளிகளுடன் சீனாவை இரண்டாமிடத்திற்குத் தள்ளி தங்கப் பதக்கத்தை வென்றதோடு, உலக சாதனையையும் முறியடித்திருக்கிறது.
துப்பாக்கிச் சூடு
தனிநபர் துப்பாக்கிச் சூட்டில் மேலும் இரு பதக்கங்கள்:
குழு விளையாட்டில் மட்டுமல்லது, 10மீ ஏர் பில்டல் மகளிர் பிரிவிலும் இந்திய வீராங்கணைகளான பாலக் மற்றும் ஈஷா சிங் ஆகியோர் இரண்டு பதக்கங்களை வென்று அசத்தியிருக்கிறார்கள்.
இவர்களில் பாலக் தங்கப் பதக்கத்தையும், அதே போட்டியில் ஈஷா சிங் வெள்ளிப் பதக்கத்தையும் வென்றிருக்கிறார்கள்.
மேலும், 50மீ ரைபிள் 3P ஆண்கள் பிரிவில் ஸ்வப்னில் குசாலே மற்றும் அஷ்வரி டோமர் ஆகியோர் இறுதிச் சுற்றுக்கு முன்னேறியிருக்கிறார்கள்.
ஆசிய விளையாட்டுப் போட்டிகளில் தற்போது வரை 30 பதக்கங்களை வென்றிருக்கிறது இந்தியா, அவற்றில் 16 பதக்கங்கள் துப்பாக்கிச் சூட்டில் மட்டுமே பெறப்பட்டிருக்கின்றன. துப்பாக்கிச் சூட்டில் 5 தங்கம், 6 வெள்ளி மற்றும் 5 வெண்கலம் உட்பட 16 பதக்கங்களை வென்றிருக்கிறது இந்தியா.
டென்னிஸ்
டென்னிஸ் விளையாட்டில் வெள்ளிப் பதக்கம்:
டென்னிஸ் விளையாட்டின் ஆண்கள் இரட்டையர் பிரிவில் வெள்ளிப் பதக்கத்தை வென்றிருக்கிறது இந்தியாவைச் சேர்ந்த ராம்குமார் ராமநாதன் மற்றும் சாகெத் மைனெனி இணை.
இறுதிச் சுற்றில் தங்களை எதிர்த்துப் போட்டியிட்ட தைவானைச் சேர்ந்த ஜேசன் ஜங் மற்றும் சூ யூ சியூ இணையிடம் 4-6, 4-6 என்ற நேர்செட் கணக்கில் தோல்வியைத் தழுவி வெள்ளிப் பதக்கத்தை வென்றிருக்கிறது இந்திய ஆண்கள் இரட்டையர் அணி.
முன்னதாக, இந்த இணையானது அரையிறுதியில் தென்கொரியாவின் சோனோன்வூ குவோன் மற்றும் சியோஞ்சன் ஹாங் ஜோடியை 6-1, 6-7, 10-0 என்ற செட் கணக்கில் எளிதாக வீழ்த்தி இறுதிச் சுற்றுக்கு முன்னேறியிருந்தது.