உலகக்கோப்பை இறுதிப்போட்டிக்கு பயன்படுத்திய பிட்சுக்கு 'சராசரி' மதிப்பீட்டை அளித்த ஐசிசி
செய்தி முன்னோட்டம்
கடந்த மாதம் இந்தியா மற்றும் ஆஸ்திரேலிய அணிகளுக்கு இடையேயான 2023 ஒருநாள் உலகக்கோப்பைத் தொடரின் இறுதிப் போட்டியானது குஜராத்தில் உள்ள நரேந்திர மோடி கிரிக்கெட் மைதானத்தில் நடைபெற்றது.
இந்த இறுதிப் போட்டியில் ஆறு விக்கெட்டுகள் வித்தியாசத்தில் ஆஸ்திரேலிய அணியிடம் தோல்வியைத் தழுவி மற்றுமொரு கோப்பையை இழந்தது இந்தியா. ஆனால், மறுபுறம் ஐந்தாவது முறையாக ஒருநாள் உலகக்கோப்பையை வென்று சாதனை படைத்தது ஆஸ்திரேலியா.
இந்நிலையில் இந்தியாவில் நடைபெற்ற ஒருநாள் உலகக்கோப்பைத் தொடரில் பயன்படுத்தப்பட்ட கிரிக்கெட் பிட்சுகளுக்கான மதிப்பீட்டை வழங்கியிருக்கிறது சர்வதேச கிரிக்கெட் வாரியம்.
அதன்படி, இறுதிப் போட்டிக்கு பயன்படுத்தப்பட்ட நரேந்திர மோடி மைதானத்தின் பிட்சுக்கு 'சராசரி' (Average) என்ற மதிப்பீட்டை வழங்கியிருக்கிறது ஐசிசி.
கிரிக்கெட்
பிற பிட்சுகளுக்கான மதிப்பீடு:
நரேந்திர மோடி மைதானத்தின் பிட்ச் மட்டுமின்றி, லீக் போட்டிகளுக்குப் பயன்படுத்தப்பட்ட கொல்கத்தாவின் ஈடன் கார்டன் மைதனத்தின் பிட்ச், சென்னை சேப்பாகம் மைதானத்தின் பிட்ச் மற்றும் லக்னோ மைதான பிட்சுகளுக்கும் சராசரி மதிப்பீட்டையே அளித்திருக்கிறது ஐசிசி.
இந்தியா மற்றும் நியூசிலாந்து அணிகள் மோதிக்கொண்ட முதல் அரையிறுதிப் போட்டியானது மும்பையில் உள்ள வான்கடே மைதானத்தில் நடைபெற்றது. இந்த மைதானத்தின் பிட்சுக்கு நல்ல (Good) பிட்ச் என்ற மதிப்பீட்டை வழங்கியிருக்கிறது ஐசிசி.
ஆஸ்திரேலியா மற்றும் தென்னாப்பிரிக்கா அணிகளுக்கு இடையே நடைபெற்ற இரண்டாவது அரையிறுதிப் போட்டிக்கான பிட்சுக்கும் சராசரி மதிப்பீட்டையே ஐசிசி அளித்திருக்கிறது.
அந்தப் போட்டியில் தென்னாப்பிரிக்க அணி வெறும் 212 ரன்களை மட்டுமே குவித்திருந்தது. ஆனால், அதனையும் ஆஸ்திரேலிய அணி சிரமப்பட்டே சேஸ் செய்தது குறிப்பிடத்தக்கது.