ஆசிய வாள்வீச்சு சாம்பியன்ஷிப்பில் பதக்கம் வென்ற முதல் இந்தியர், யார் இந்த பவானி தேவி?
செய்தி முன்னோட்டம்
இந்திய வாள்வீச்சு வீராங்கனை பவானி தேவி திங்களன்று (ஜூன் 19), சீனாவின் வுக்ஸியில் நடந்த ஆசிய சாம்பியன்ஷிப் போட்டியில் பெண்களுக்கான சேபர் அரையிறுதியில் தோல்வியடைந்து வெண்கலம் வென்றார்.
இதன் மூலம் ஆசிய வாள்வீச்சு சாம்பியன்ஷிப்பில் இந்தியாவிற்கு முதல் பதக்கத்தை பெற்றுக் கொடுத்து வரலாறு படைத்தார்.
பவானி தேவி அரையிறுதியில் உஸ்பெகிஸ்தானின் சைனாப் தயிபெகோவாவிடம் 14-15 என்ற புள்ளிக்கணக்கில் போராடி தோற்றார்.
பவானியின் வெற்றிக்கு மத்திய விளையாட்டுத் துறை அமைச்சர் அனுராக் தாக்கூர் உள்ளிட்ட பலரும் வாழ்த்து தெரிவித்துள்ளனர்.
இந்திய வாள்வீச்சு சங்கத்தின் பொதுச்செயலாளர் ராஜீவ் மேத்தா, "இந்திய வாள்வீச்சுக்கு இது மிகவும் பெருமையான நாள். இதுவரை யாராலும் சாதிக்க முடியாததை பவானி சாதித்துள்ளார். அவரை வாள்வீச்சு சங்கம் சார்பாக வாழ்த்துகிறேன்." என்று தெரிவித்துள்ளார்.
background of ca bhavani devi
பவானி தேவியின் பின்னணி
தமிழகத்தின் சென்னையை சேர்ந்த பவானி தேவி பள்ளியில் ஆறாம் வகுப்பில் படிக்கும்போது வாள்வீச்சு பயிற்சியில் சேர்ந்துள்ளார்.
பத்தாம் வகுப்பை முடித்த பிறகு, கேரளாவில் உள்ள இந்திய விளையாட்டு ஆணையத்தின் பயிற்சி மையத்தில் சேர்ந்து பயிற்சியை தொடங்கிய பவானி தேவி, தனது 14வயதில் துருக்கியில் நடந்த சர்வதேச போட்டியில் கலந்துகொண்டார்.
அதில் போட்டிக்கு மூன்று நிமிடம் தாமதமாக சென்றதால் போட்டியிலிருந்து வெளியேற்றப்பட்டாலும், அடுத்தடுத்த போட்டிகளில் சிறப்பாக செயல்பட்டு பல பதக்கங்களை குவித்துள்ளார்.
குறிப்பாக டோக்கியோ ஒலிம்பிக்கிற்கு தேர்வாகி சர்வதேச அளவில் கவனம் ஈர்த்து, ஒலிம்பிக்கில் வாள்வீச்சிற்கு தகுதி பெற்ற முதல் இந்தியர் என்ற சாதனையை படைத்ததோடு, தற்போது இந்திய வாள்வீச்சு விளையாட்டின் முகமாக மாறியுள்ளார்.