ஆசிய கோப்பை ஹாக்கிப் போட்டியில் பாகிஸ்தானுக்கு பதிலாக பங்களாதேஷ் அணி சேர்க்கப்பட வாய்ப்பு என தகவல்
செய்தி முன்னோட்டம்
ஆகஸ்ட் 29 அன்று தொடங்கவிருக்கும் ஆடவர் ஹாக்கி ஆசிய கோப்பை 2025 தொடரில், பாகிஸ்தான் பங்கேற்க மறுத்துவிட்டதால், கடைசி நேரத்தில் ஒரு மாற்றம் ஏற்பட்டுள்ளது. பாதுகாப்பு காரணங்களைக் குறிப்பிட்டு, பாகிஸ்தான் ஹாக்கி கூட்டமைப்பு (PHF) இந்தத் தொடரில் பங்கேற்க மறுத்துள்ளது. இந்திய அரசு விசாவை வழங்குவதாக உறுதியளித்திருந்த போதிலும் இந்த முடிவு எடுக்கப்பட்டுள்ளது. பாகிஸ்தானின் விலகலை அடுத்து, போட்டி அமைப்பாளர்கள் பங்களாதேஷை மாற்று அணியாகக் கலந்துகொள்ள அழைத்துள்ளனர். அவர்களின் பங்கேற்பு குறித்த இறுதி முடிவு அடுத்த இரண்டு நாட்களில் தெரியவரும். ஹாக்கி இந்தியா அதிகாரியின் கூற்றுப்படி, பாகிஸ்தான் பங்கேற்காததால், பங்களாதேஷிற்கு அழைப்பு விடுக்கப்பட்டுள்ளது.
ஆசிய கோப்பை
ஆசிய கோப்பை ஹாக்கியில் பங்கேற்கும் நாடுகள்
பீகார் மாநிலம் ராஜ்கிரில் நடைபெறவிருக்கும் ஆசிய கோப்பை ஹாக்கி தொடரில், இந்தியா, சீனா, ஜப்பான், மலேசியா, தென் கொரியா, ஓமன் மற்றும் சீன தைபே உள்ளிட்ட ஆசியாவின் சிறந்த அணிகள் பங்கேற்கின்றன. இந்த ஆசிய கோப்பை தொடர், பெல்ஜியம் மற்றும் நெதர்லாந்தில் அடுத்த ஆண்டு நடைபெறும் 2026 ஹாக்கி உலகக்கோப்பைக்கான தகுதிச் சுற்றாக செயல்படுகிறது. இதில் பங்கேற்கும் எட்டு அணிகளில் ஐந்து அணிகள் உலகக் கோப்பைக்குத் தகுதி பெறும். அண்மையில் நடந்த பஹல்காம் தாக்குதலைத் தொடர்ந்து இரு நாடுகளுக்கும் இடையே ஏற்பட்ட ராணுவ மோதலுக்குப் பிறகு பாகிஸ்தானின் பங்கேற்பு கேள்விக்குறியாக இருந்த நிலையில், தற்போது அந்நாடு வர மறுப்பு தெரிவித்துள்ளது குறிப்பிடத்தக்கது.