அமெரிக்க நீதிமன்றத்தில் கூகுளுக்கு எதிராக சாட்சியம் அளித்த சத்யா நாதெல்லா
செய்தி முன்னோட்டம்
எந்தவொரு சந்தையில் போட்டி என்பது மிகவும் அவசியம். போட்டியில்லாத வணிகம் என்பது ஒரு குறிப்பிட்ட நபர் அல்லது நிறுவனத்திடம் ஒட்டு மொத்த அதிகாரத்தையும் அளிப்பதற்கு சமமாகிறது. எனவே, அனைத்து சந்தைகளிலும் போட்டி நிலவுவதை உறுதி செய்ய அனைத்து நாட்டு அரசுகளும் தனி அமைப்புகளை நிறுவியிருக்கின்றன.
நவீன காலத்தில் இணையத்தில் தேடுபொறி சேவையில் பெரிய அளவிலான போட்டியின்றி ஏகபோக அதிகாரத்தைப் பெற்றிருக்கிறது கூகுள். இணையத் தேடுதல் என்பதற்கான அகராதியாக விளங்குகிறது கூகுள்.
இந்நிலையில், சந்தையில் உருவாகும் போட்டியாளர்களை தங்களுடைய ஏகபோக அதிகாரத்தைப் பயன்படுத்தி கூகுள் தலைதூக்க விடாமல் செய்வதாகவும், போட்டியைக் கட்டுப்படுத்த பல்வேறு முறைகேடுகளில் ஈடுபடுவதாகவும் கூகுள் மீது பல்வேறு குற்றசாட்டுக்களை முன்வைத்து வழக்கு தொடர்ந்திருக்கிறது அமெரிக்க நீதித் துறை.
மைக்ரோசாஃப்ட்
சாட்சியம் அளித்த அழைக்கப்பட்ட சத்யா நாதெல்லா:
கூகுளின் தாய் நிறுவனமான ஆல்ஃபப்டெட்டுக்கு எதிராகத் தொடரப்பட்டிருக்கும் இந்த வழக்கில், அரசுத் தரப்பில் சாட்சியளிக்க மைக்ரோசாஃப்ட் நிறுவனத்தின் தலைமை செயல் அதிகாரியான சத்யா நாதெல்லா அழைக்கப்பட்டிருந்தார்.
தேடுபொறி சேவை மட்டுமின்றி, மின்னஞ்சல், மேகக் கணினியம் எனப் பல்வேறு துறைகளில் மைக்ரோசாஃப்டும், கூகுளும் போட்டியாளர்களாக இருக்கின்றன. இரண்டுமே தொழில்நுட்பப் பெரு நிறுவனங்கள் தாம்.
ஆனால், மைக்ரோசாஃர்ட் போன்ற ஒரு பெருநிறுவனத்தாலேயே தேடுபொறி சேவையில் கூகுளை எதிர்த்து நிற்க முடியவில்லை.
அவரை கூகுளுக்கு எதிரான இந்த வழக்கில் கூகுளுக்கு எதிரான சந்தை நிலவரத்தை, கூகுளின் முறைகேடுகளைப் பற்றி சாட்சியம் தெரிவிப்பதற்காக நீதிமன்றத்தில் ஆஜர்படுத்தியிருந்தது அமெரிக்க நீதித் துறை.
கூகுள்
சத்யா நாதெல்லாவின் சாட்சியம்:
ஆப்பிளுடன் கூகுள் செய்திருக்கும் ஒப்பந்தம் காரணமாக தங்களால் ஆப்பிள் சாதனங்களில் நுழைய முடிவில்லை எனத் தெரிவித்திருக்கிறார் சத்யா நாதெல்லா.
'மிகவும் பிரபலமான சேவையாக இருப்பதால் கூகுளை அனைவரும் பயன்படுத்தவில்லை, தங்களுடைய வழிமுறைகளைப் பயன்படுத்தி மக்களைப் பயன்படுத்த வைக்கிறது அந்நிறுவனம். பிரபலமான தேடுபொறியாக அறியப்படுவதற்கே பல்வேறு முறையற்ற வழிமுறைகளை கூகுள் பயன்படுத்தியது' என குற்றம்சாட்டியிருக்கிறார் அவர்.
கூகுள் தேடுபொறி சேவையை மட்டும் அளிக்கவில்லை, குரோம் உலாவி, ஜிமெயில் மின்னஞ்சல் எனப் பல்வேறு பிரிவுகளிலும் தங்களது சேவைத் தளத்தை விரிவுபடுத்தியிருக்கிறது.
எனவே, கூகுளின் விருப்பத்திற்கு எதிராகச் செயல்பட யாரும் விரும்புவதில்லை. மேலும், மற்ற போட்டியாளர்களால் கொடுக்க முடியாத பெருந்தொகையைக் கொடுத்து ஒப்பந்தங்களை மேற்கொள்கிறது கூகுள். இதனால் எவராலும் கூகுளுடன் போட்டியிட முடிவதில்லை எனத் தெரிவித்துள்ளார் அவர்.