நிலவின் மண் மற்றும் பாறை மாதிரிகளை பூமிக்கு எடுத்து வர இஸ்ரோவின் புதிய திட்டம்
செய்தி முன்னோட்டம்
கடந்த ஆகஸ்ட் மாத இறுதியில், சந்திரனின் தென்துருவப் பகுதியில் வெற்றகரமாகத் தரையிறங்கி விண்வெளித் தொழில்நுட்பத்துறையில் புதிய சாதனை படைத்தது இந்தியா. அதனைத் தொடர்ந்து இஸ்ரோ, சூரியனை ஆய்வு செய்யும் ஆதித்யா-L1 திட்டம் வெற்றிகரமாக செயல்படுத்தப்பட்டு வருகிறது.
இந்த வெற்றிகளைத் தொடர்ந்து, அடுத்த 20 ஆண்டுகளில் மேலும் பல விண்வெளித் திட்டங்களை செயல்படுத்தும் முனைப்போது இருக்கிறது இஸ்ரோ.
அதில் ஒரு திட்டமாக, நிலவிலிருந்து மண் மற்றும் பாறை மாதிரிகளை பூமிக்கு எடுத்து வருவதையும், இஸ்ரோ செயல்படுத்தவிருப்பதாகத் தெரிவித்திருக்கிறார் இஸ்ரோ Space Application Centre-ன் இயக்குநர் நிலேஷ் தேசாய்.
அடுத்த ஐந்து முதல் ஏழு வருடங்களுக்குள் இந்த நிலவு மாதிரியை பூமிக்கு எடுத்து வரும் திட்டத்தை செயல்படுத்த இஸ்ரோ ஆர்வம் காட்டி வருவதாகத் தெரிவித்திருக்கிறார் அவர்.
இஸ்ரோ
நிலவின் மாதிரிகளை பூமிக்கும் எடுத்து வரும் இஸ்ரோவின் புதிய திட்டம்:
இந்த திட்டத்திற்கு நான்கு வகையான மாடியூல்கள் மற்றும் இரண்டு ராக்கெட்டுகளை இஸ்ரோ பயன்படுத்தும் எனத் தெரிவித்திருக்கிறார் நிலேஷ் தேசாய்.
டிரான்ஸ்பர் மற்றும் ரீ-எண்ட்ரி மாடியூல்களுக்கு GSLV மார்க்-II ராக்கெட்டையும், அசன்டர் மற்றும் லேண்டர் மாடியூல்களுக்கு GSLV மார்க்-III ராக்கெட்டையும் இஸ்ரோ பயன்படுத்தலாம் எனத் தெரிவித்துள்ளார் அவர்.
சந்திரயான்-3 தரையிறங்கிய சிவ சக்தி புள்ளியில் இருந்தே நிலவின் மாதிரிகளை சேகரிக்கத் திட்டமிட்டு வருவதாகக் கூறப்படும் நிலையில், சந்திரயான்-3 திட்டத்தைப் போலவே இதனையும் பூமியின் கணக்கில் 14 நாட்களுக்குள் செயல்படுத்தி முடிக்க இஸ்ரோ திட்டமிட்டு வருதவதாகத் தெரிவிக்கப்பட்டுள்ளது.
தற்போது முதற்கட்டமாக இத்திட்டத்தை 2028ம் ஆண்டு செயல்படுத்த இஸ்ரோ இலக்கு நிர்ணயித்திருப்பதாகத் தெரிவிக்கப்பட்டுள்ளது குறிப்பிடத்தக்கது.