பிக்சல் 8 சீரிஸிற்கு 5 ஆண்டுகள் ஆண்ட்ராய்டு அப்டேட் வழங்கவிருக்கும் கூகுள்
செய்தி முன்னோட்டம்
பிக்சல் 7 சீரிஸைத் தொடர்ந்து, வரும் அக்டோபர் மாதம் தங்களுடைய புதிய பிக்சல் 8 சீரிஸ் ஸ்மார்ட்போன்களை வெளியிடத் தயாராகி வருகிறது கூகுள். இந்த புதிய ஸ்மார்ட்போன் சீரிஸிற்கு ஆப்பிளைப் போலவே, ஐந்து ஆண்டு இயங்குதள அப்டேட் கொடுக்கத் திட்டமிட்டு வருகிறது அந்நிறுவனம்.
உலகின் முன்னணி ஸ்மார்ட்போன் தயாரிப்பாளரான ஆப்பிள், தங்களுடைய ஐபோன்களுக்கு ஐந்து ஆண்டுகள் வரை இயங்குதள அப்டேட் கொடுத்து வருகிறது. இதனால் 2018ம் ஆண்டு வெளியான ஐபோன் XR-ம் அடுத்து வெளியாகும் ஐஓஎஸ் 17 இயங்குதளத்தைப் பெறவிருக்கின்றன.
மற்றொரு முன்னணி ஸ்மார்ட்போன் தயாரிப்பு மற்றும் விற்பனை நிறுவனமான சாம்சங்கோ, தங்களுடைய ப்ரீமியம் சாதனங்கள் அனைத்திற்கும் நான்கு ஆண்டுகள் வரை இயங்குதள அப்டேட்டை வழங்கி வருகிறது.
கூகுள்
கூகுளின் புதிய திட்டம்:
நீண்ட காலம் ஒரே ஸ்மார்ட்போனை பயன்படுத்த விரும்பும் வாடிக்கையாளர்கள், கூகுளின் இந்தத் திட்டத்தினால் பிக்சல் ஸ்மார்ட்போன்களை வாங்குவதைப் பரிசீலிக்கக்கூடும்.
ஐந்த வருட இயங்குதள அப்டேட் என்பது பயனாளர்கள் மத்தியில் கணிசமான அளவு தாக்கத்தை ஏற்படுத்தும் என எதிர்பார்க்கிறது கூகுள்.
பிக்சல் 8 சீரிஸின் கீழ், பிக்சல் 8 மற்றும் பிக்சல் 8 ப்ரோ ஆகிய இரண்டு மொபைல்களை வெளியிடத் திட்டமிட்டிருக்கிறது அந்நிறுவனம்.
கூகுள் நிறுவனமே தயாரிக்கும் டென்சார் G3 சிப் மற்றும் ஆண்ட்ராய்டு 14 இயங்குதளத்துடன் புதிய பிக்சல் 8 சீரிஸ் ஸ்மார்ட்போன்கள் வெளியாகவிருக்கின்றன.
கூகுளின் ஐந்து வருட இயங்குதள அப்டேட் என்பது பிற ஸ்மார்ட்போன் தயாரிப்பாளர்களையும், இதே போன்று கூடுதல் காலத்திற்கு இயங்குதள அப்டேட்டை வழங்குவதற்கு வழிவகை செய்யும் என எதிர்பார்க்கப்படுகிறது.