செப்டம்பர் 18 அன்று பூமியை நெருங்கி வரும் மிகப்பெரிய சிறுகோள்; நாசா தீவிர கண்காணிப்பு
செய்தி முன்னோட்டம்
2025 எஃப்ஏ22 என்ற மிகப்பெரிய சிறுகோள், செப்டம்பர் 18, 2025 அன்று பூமிக்கு மிக அருகில் கடந்து செல்ல உள்ளது. இது, உலகம் முழுவதும் உள்ள விஞ்ஞானிகள் மற்றும் வானியல் ஆய்வாளர்களின் கவனத்தை ஈர்த்துள்ளது. இந்த சிறுகோளை, நாசாவின் புவிக்கு அருகில் உள்ள விண்வெளிப் பொருட்கள் ஆய்வு மையம் (CNEOS) மற்றும் ஜெட் உந்துவிசை ஆய்வகம் (JPL) ஆகியவை கண்காணித்து வருகின்றன. இந்தச் சிறுகோளின் அளவு மிகவும் ஆர்வத்தை ஏற்படுத்தியுள்ளது. அதன் விட்டம் 120 முதல் 280 மீட்டர் வரை இருக்கலாம் என மதிப்பிடப்பட்டுள்ளது.
அளவு
சிறுகோளின் அளவு
இதை ஒப்பிட்டுப் பார்க்கும்போது, டெல்லியில் உள்ள குதுப்மினார் 73 மீட்டர் உயரம் கொண்டது. சிறுகோளின் சிறிய அளவே, குதுப்மினாரை விட இருமடங்கு உயரம் கொண்டது. அதன் பெரிய அளவு, குதுப்மினாரை விட நான்கு மடங்கு பெரிதாக இருக்கும். பூமிக்கு அருகில் வரும்போது, இந்தச் சிறுகோள் 8,42,000 கிமீ தூரத்தில், அதாவது சந்திரனை விட இரு மடங்கு தூரத்தில் கடந்து செல்லும். இந்தக் குறைந்த தூரம், விண்வெளி விஞ்ஞானிகள் மற்றும் அமெச்சூர் வானியல் ஆய்வாளர்களுக்கு அதன் அமைப்பு மற்றும் சுற்றுப்பாதையைப் பற்றி ஆய்வு செய்ய ஒரு அரிய வாய்ப்பை அளிக்கிறது.
கண்காணிப்பு
சர்வதேச சிறுகோள் எச்சரிக்கை நெட்வொர்க் கண்காணிப்பு
சர்வதேச சிறுகோள் எச்சரிக்கை நெட்வொர்க் (IAWN) போன்ற குழுக்கள், இந்த வாய்ப்பைப் பயன்படுத்திச் சிறுகோளின் சுற்றுப்பாதையை மேலும் துல்லியமாக்கவும், அதன் அமைப்பைப் பற்றிய தகவல்களைப் பெறவும் சக்திவாய்ந்த தொலைநோக்கிகள் மற்றும் ராடார் தொழில்நுட்பத்தைப் பயன்படுத்தத் திட்டமிட்டுள்ளன. இந்தச் சிறுகோள் அபாயகரமான சிறுகோள் என வகைப்படுத்தப்பட்டாலும், அது பூமிக்கு எந்த அச்சுறுத்தலையும் ஏற்படுத்தாது என நிபுணர்கள் உறுதிப்படுத்தியுள்ளனர். இது போன்ற பெரிய சிறுகோள்கள் பத்தாண்டுகளுக்கு ஒருமுறை மட்டுமே பூமிக்கு அருகில் கடந்து செல்கின்றன. எனவே, இது எதிர்கால தாக்க மாதிரிகள் (impact modelling) மற்றும் இது போன்ற விண்வெளிப் பொருட்களைப் புரிந்துகொள்வதற்கு மதிப்புமிக்க தரவுகளை வழங்கும்.