பூமியை சுற்றப் போகும் இரண்டாம் நிலவு; அதற்கும் மகாபாரத அர்ஜுனனுக்கும் இப்படியொரு தொடர்பா!
செய்தி முன்னோட்டம்
ஒரு சிறிய நிலவு போல தோன்றக்கூடிய சிறுகோள் ஒன்று பூமிக்கு அருகே விரைவில் வரவுள்ளது. 2024 PT5 என்று பெயரிடப்பட்ட அந்த சிறுகோள் வெறும் 33 அடி நீளம் கொண்டது மற்றும் அண்டவெளியில் பயணிக்கிறது. இது விரைவில் பூமியின் ஈர்ப்பு விசையால் ஒரு ஒற்றை சுற்றுப்பாதையில் இயங்க ஆரம்பிக்கும். 2024 PT5 சிறுகோள் அதன் அண்ட பயணத்தைத் தொடரும் முன் கிரகத்தைச் சுற்றியுள்ள குதிரைவாலி வடிவ சுற்றுப்பாதையில் பயணிக்கும். பூமியின் ஈர்ப்பு விசையால் ஒரு சிறுகோள் ஈர்க்கப்படுவதைப் பார்ப்பது மிகவும் அரிது. பெரும்பாலான சந்தர்ப்பங்களில் சிறுகோள்கள் பூமியைத் தவறவிடுகின்றன அல்லது கிரகத்தின் வளிமண்டலத்தில் நுழையும் போது எரிகின்றன. பூமியின் ஈர்ப்பு விசையிலிருந்து தப்பிக்க முடியாத ஒரு சிறுகோள் மினி நிலவு என்று அழைக்கப்படுகிறது.
53 நாட்கள்
பூமியை 53 நாட்கள் மட்டும் சுற்றி விலகும் சிறுகோள்
2024 PT5 ஒரு சிறிய சிறுகோள் என்பதால், பூமியின் ஈர்ப்பு விசையில் உள்ளே நுழைந்தாலும், அது சிறப்பு தொலைநோக்கிகள் மூலம் மட்டுமே தெரியும். 2024 PT5 சிறுகோள், ஆகஸ்டு 7 அன்று ஆஸ்டிராய்ட் டெரஸ்ட்ரியல்-இம்பாக்ட் லாஸ்ட் அலர்ட் சிஸ்டம் மூலம் முதன்முதலில் கண்டுபிடிக்கப்பட்டது. செப்டம்பர் 29 முதல் நவம்பர் 25 வரை பூமியைச் சுற்றி, பின்னர் அது நமது கிரகத்தின் ஈர்ப்பு விசையிலிருந்து விடுபட்டு அதன் பயணத்தைத் தொடரும். இந்த சிறுகோள் சூரிய குடும்பத்தில் உள்ள அர்ஜுனா சிறுகோள் குடும்பத்தைச் சேர்ந்ததுபோல் உள்ளதாகக் கூறப்படுகிறது. 1991இல் அர்ஜுனா என்ற பெயரை சிறுகோள் குடும்பத்திற்கு வைத்த ஆஸ்திரேலியாவின் சைடிங் ஸ்பிரிங் ஆய்வகத்தில் வானியலாளர் ராபர்ட் எச்.மெக்நாட், மகாபாரத புராணத்தால் ஈர்க்கப்பட்டே அந்த பெயரை வைத்தார்.